އައްޑޫ ސިޓީ، ހިތަދޫ ފުއްޓަރު ފަރާތަށް މޫދަށް ގޮސް އުޅެނިކޮށް ގެނބެމުން ދިޔަ ކުއްޖަކު ސަލާމަތް ކުރުމަށް، ހިތަދޫ/ބްލޫރޫމް، ހަސަން ޙުސައިން ކުރި މަސައްކަތުގެ އަގު ވަޒަންކުރުމަށް އައްޑޫ ސިޓީ ކައުންސިލުން ނިންމައިފިއެވެ.
ކައުންސިލުގެ އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި އެކަަމަށްޓަކައި ކައުންސިލް އިދާރާގައި މާދަމާ ބާއްވާ ބައްދަލުވުމަކަށް ޙަސަން އަށް ދައުވަތު ފޮނުވާފައިވާ ކަމަށެވެ.
އެހެން ނަމަވެސް އެ ބައްދަލުވުމާއި ބެހޭ އިތުރު ތަފްސީލެއް އޮފިޝަލް ނުދެއްވައެވެ.
ކައުންސިލުން ފޮނުވި ސިޓީގައި ބުނެފައިވާ ގޮތުގައި، އިންސާނިއްޔަތަށް ޓަކައި ހަސަން ކުރެއްވި މަސައްކަތުގެ އަގު ވަޒަން ކުރުމަށް ކައުންސިލުން ބޭނުންވެއެވެ.
ޙަސަން އެނގޭ މީހުން ބުނާ ގޮތުގައި، އޭނާ އަކީ މީހުންނާއި ގުޅޭ ވަރަށް އެކުވެރި މިޒާޖެއްގެ މީހެކެވެ. ޙަސަން އާއި އެކު މަސްވެރިކަމުގެ ހަރަކާތްތެރިވާ މަސްވެރިން ބުނާ ގޮތުގައި އޭނާ އަކީ ވަރަށް ކުޅަދާނަ މަސްވެރިއެކެވެ.