އައްޑޫ ސިޓީ، ހިތަދޫން މޫދަށް އެރި އުޅެނިކޮށް ގެއްލިފައިވާ 2 ކުދިން ހޯދުމުގެ މަސައްކަތަށް ހިތަދޫ ޒުވާނުން މިއަދު ވެސް ނިކުމެއްޖެއެވެ.
ހިތަދޫ، ޗަނބޭލީގެ، އަލީ ފަހުމީ 17، އަދި ޓޮޕާޒް، މަޔާމިން އަލީ 14 ގެއްލިފައިވަނީ އިތުރު ކުއްޖަކާއި އެކު މޫދަށް އެރި އުޅެނިކޮށް މިމަހުގެ 21 ވަނަ ދުވަހުގެ މެންދުރުގެ ވަގުތެއްގައެވެ.
އެ ދުވަހުން ފެށިގެން ހިތަދޫގެ ޒުވާނުން ގެންދަނީ މެދުކެނޑުމެއް ނެތި އެކުދިން ހޯދުމުގެ މަސައްކަތް ކުރަމުންނެވެ. އެގޮތުން ކޮންމެ ދުވަހަކު ވެސް ހެނދުނު ނިކުންނަ ގޮތަށް އިރުއޮއްސުމާއި ހަމައަށް އެ މަސައްކަތް ކުރިއަށް ގެންދެއެވެ.
ގެއްލުނު 2 ކުދިން ހޯދުމުގެ މަސައްކަތުގައި އެންމެ ބޮޑު އެހީތެރިކަމެއް ފޯރުކޮށްދެމުން ގެންދަނީ، ހިތަދޫ އަލި، ޙުސައިން ސޯލިޙް އެވެ. މަޔާމީން އާއި އަލީ ފަހުމީ ގެއްލުނު ހިސާބަށް ކޮންމެ ދުވަހަކު ވެސް ހިތަދޫގެ ޑައިވަރުން ގޮވައިގެން ދަނީ ހުސައިން ސޯލިޙްގެ ލޯންޗްގައެވެ.
މީގެ އިތުރުން، ވެސް ހިތަދޫގެ ބައެއް އާއްމު ރައްޔިތުން ދަނީ ޑިންގީ ތަކާއި ލޯންޗް އަދި މަސް ދޯނި ފަހަރުގައި ގެއްލުނު ކުދިން ހޯދުމުގެ މަސައްކަތް ކުރަމުންނެވެ.
އެހެން ނަމަވެސް މިހާތަނަށް އެ ދެކުދިންގެ ޚަބަރެއް ވެފައެއް ނުވެއެވެ. ގެއްލުނު ކުދިން ހޯދުމުގެ މަސައްކަތް އެމްއެންޑީއެފުން ވެސް މެދުކެނޑުމެއް ނެތި ކުރަމުން އަންނައިރު، މިއަދު މެންދުރުގެ ވަގުތެއްގައި އެ މަސައްކަތުގައި ރޮބޮޓް ބޭނުންކުރަން ފަށާނެ ކަމަށް މައުލޫމާތު ލިބެއެވެ.