މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ފައިނަލް ބުރުގެ ގްރޫޕް ބީގައި މިއަދު ކުޅުނު މެޗްގައި ހޯޑެއްދޫ އާއި ވާދަކޮށް ހިތަދޫ އެފްސީން ކާމިޔާބުކޮށްފިއެވެ. މިމެޗް ހިތަދޫ އެފްސީން ކާމިޔާބު ކުރީ 1-4 އިންނެވެ.
މި މޮޅާއި އެކު ހިތަދޫ އެފްސީ ވަނީ ގްރޫޕްގެ 1 ވަނައަށް ޖެހިލާފައެވެ. ހިތަދޫ އެފްސީއަށް ކުރި ލިބެނީ ފައިދާ ގޯލުގެ ތަފާތުންނެވެ.
މިއަދުގެ މެޗްގައި ހިތަދޫ ޓީމުގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު މެޗް ފަށައިގެން ގިނަ އިރުތަކެއް ނުވެ ހިތަދޫ ޓީމުގެ އަޓަންގަނާ ވަނީ ލަނޑެއް ޖަހައި އެ ޓީމަށް ލީޑު ނަގައިދީފައެވެ.
ހިތަދޫ ޓީމުގެ ދެވަނަ ލަނޑު ކާމިޔާބު ކުރީ މެޗްގެ މޮޅު ކުޅުންތެރިޔަކަށް ހޮވުނު އާނާއެވެ. އަދި ފުރަތަމަ ހާފު ނިމުމުގެ ކުރިން، މުހައްމަދު ސައީދް(ލޮޖާ) ވަނީ ހިލޭޖެހުމަކުން ލަނޑެއް ޖަހައި ހިތަދޫގެ ލީޑު އިތުރަށް ފުޅާކޮށްދީފައެވެ.
ފުރަތަމަ ހާފް ނިމުނީ، 0-3 އިން ހިތަދޫ ކުރީގައި އޮވެގެންނެވެ.
ދެވަނަ ހާފް ފަށައިގެން މާގިނަ އިރުތަކެއް ނުވެ ހިތަދޫން ވަނީ އަނެއްކާވެސް ލަނޑެއް ޖަހައި މެޗްގެ ނަތީޖާ 0-4 އަށް ބަދަލުކޮށްފައެވެ. މި ލަނޑަށް ފަހު ވެސް ހިތަދޫ ޓީމަށް ލަނޑު ޖަހާނެ ގިނަ ފުރުސަތުތަކެއް ވަނީ ލިބިފައެވެ.
ހޯޑެއްދޫން މި މެޗްގައި ޖެހި ހަމައެކަނި ލަނޑު އެ ޓީމަށް ކާމިޔާބު ކޮށްދިނީ ޖާޒީ ނަންބަރު 16 އެވެ. މެޗުގެ މޮޅު ކުޅުންތެރިއަކަށް ހޮވުނީ މިއަދުގެ މެޗްގައިވެސް މޮޅު ކުޅުމެއް ދައްކައި ދެވަނަ ލަނދު ޓީމަށް ޖަހައިދިން މ. މުލަކު އާދަމް ޝަހީމް (އާނާ)އެވެ.
ހިތަދޫ ޓީމަށް ސަޕޯޓް ކުރުމަށް ވ.ވޮއްމުލި ރިސޯޓުގައި މަސައްކަތް ކުރާ އައްޑޫ ޒުވާނުން ވަނީ މިއަދުވެސް ނިލަންދޫ އަށް ގޮސް ފިސާރި ސަޕޯޓެއް ކޮށްފައެވެ.
ގްރޫޕް ބީގެ މެޗްތައް ކުރިއަށް ދަނީ ފ.ނިލަންދޫގައެވެ. މި ގްރޫޕްގައި ވާދަކުރަނީ ހިތަދޫ، ތިމަރަފުށި،ކުޑަހުވަދޫ،ތިމަރަފުށި އަދި ނިލަންދޫ އެވެ. މި ގްރޫޕުން އެންމެ ގިނަ ޕޮއިންޓް ހޯދާ 2 ޓީމަށް ދިވެހި ލީގުގައި ވާދަކުރުމުގެ ފުރުސަތު ލިބިގެންދާނެއެވެ.
ހިތަދޫ ޓީމަށް ދެން ބާކީ އޮތީ، ތިމަރަފުށި އަދި ކުޑަހުވަދޫ މެޗެވެ.