ތަރައްޤީގެ ގޮތުން އައްޑޫ ސިޓީގެ އެއްވެސް ރައްޔިތަކަށް މިނިވަންކަމާއެކު އުޅެވޭނެ ސިޔާސަތެއް ރައީސް އަބްދުﷲ ޔާމީންގެ ދައުރު ނިމިގެންދާއިރު ލިބިފައި ނެތްކަމަށް ހިތަދޫ ދެކުނު ދާއިރާގެ މަޖިލިސް މެންބަރު އަލީ ނިޒާރު ވިދާޅުވެއްޖެއެވެ.
ނިޒާރު މިހެން ވިދާޅުވީ، ރާއްޖެ ޓީވީން ގެނެސްދިން 'ފަލަސުރުޚީ' ޕްރޮގްރާމްގައި ވާހަކަ ދައްކަވަމުންނެވެ.
ނިޒާރު ވިދާޅުވި ގޮތުގައި، އަތޮޅުތެރޭގެ ތަރައްޤީއަށް މިސަރުކާރުން ގެންގުޅޭ އެއްވެސް ސިޔާސަތެއް ނެތް ކަމަށެވެ. އަދި އަތޮޅުތެރޭގެ ތަރައްޤީއަށާއި އަތޮޅުތެރޭގައި މިނިވަން އިޤްތިސޯދެއް އޮވެ، ޒުވާނުން އަމިއްލަ ރަށުގައި ތިބެ މަސައްކަތްކޮށް އާމްދަނީ ހޯދުމަށް މިސަރުކާރުން ކޮށްފައިވާ އެއްވެސް ޕްލޭނެއް މިހާތަނަށް ނެތް ކަމަށެވެ.
މީގެ އިތުރުން ނިޒާރު ވިދާޅުވީ އައްޑޫއަކީ އެންމެ ގިނައިން ޒުވާނުން ކިޔަވައިގެން ނުކުންނަ ތަނަށް ވިޔަސް އެ ޒުވާނުންނަށް އިގްތިސާދީ މިނިވަންކަމެއް ހޯދައިދިނުމަށް ސަރުކާރުގެ އެއްވެސް ސިޔާސަތެއް ނެތް ކަމަށެވެ.