ކުރިއަށް އޮތް އިންތިޚާބުތަކަށް ވީހާ ވެސް ގިނަ ޒުވާނުންނާއި، ޚާއްޞަކޮށް، އަންހެން ބޭފުޅުން ކުރިމަތިލެއްވުމަށް ރައީސް ޑރ. މުޙަންމަދު ވަޙީދު އެދިވަޑައިގެންފި އެވެ.
ރައީސް މިކަމަށް އެދިވަޑައިގަތީ، އެމަނިކުފާނު ކ. ހުރައަށް އިއްޔެ ހެނދުނު ވަޑައިގެން، އެރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ޒުވާނުންނަކީ ބަދަލަށް ބޭނުންވާ ބައެއްކަން ފާހަގަކުރައްވަމުން، މިހާރު ރާއްޖޭގެ ކަންކަން ކުރިއަށްދާ ގޮތުން، ޚާއްޞަކޮށް، ފަތުރުވެރިކަމުގެ ދާއިރާގައި މަސައްކަތްކުރާ ޒުވާނުން، ރާއްޖެ އަވަސް ސްޕީޑެއްގައި ތަރައްޤީ ވާން އެބަ ބޭނުންވާ ކަމުގައި ރައީސް ވިދާޅުވިއެވެ.
ޒުވާނުންނަށާއި ޢާއިލާތަކަށް މި ޒަމާނުގެ އެކިއެކި ޚިދްމަތްތަކާއި، ދިރިއުޅުމުގެ ފަސޭހަތައް ލިބުމަކީ ބޭނުންވާ ކަމެއް ކަމަށާއި، އެކަންކަން އަވަސް ކުރުމަށްޓަކައި ކުރަންޖެހޭ ކަންކަން ކުރެވޭނީ، ރައްޔިތުން ސަރުކާރާ ގުޅިގެން މަސައްކަތް ކޮށްގެންކަން ރައީސް ބަޔާން ކުރެއްވި އެވެ. އަދި ޚާއްޞަކޮށް، ޒުވާނުންގެ ވިސްނުމާއި އެހީތެރިކަން މިކަމުގައި ސަރުކާރަށް ލިބިގެން ކަމަށް ރައީސް ވިދާޅުވި އެވެ.
ރަށްރަށުގެ ތަރައްޤީގައި އަންހެން ބޭފުޅުން އަދާކުރައްވާ ދައުރުގެ މައްޗަށް ރައީސް ބައްލަވާލައްވަމުން، ރަށްރަށުގައި މިހާރު އުފެދިފައިވާ އަންހެނުންގެ ކައުންސިލްތައް ވަރުގަދަކޮށް، ކައުންސިލްތަކަށް އާމްދަނީ ލިބޭނެގޮތް ހެދުމަށް، މިހާރަށް ވުރެ ބޮޑަށް މަސައްކަތް ކުރަން ޖެހޭ ކަމުގައި ވިދާޅުވި އެވެ. އަދި އެކަންކަން ކުރެވޭނީ ޒުވާނުންނާއި އަންހެން ބޭފުޅުންގެ ޚިޔާލު ހޯދައިގެން ކަމުގައި ވެސް އެ މަނިކުފާނު ވިދާޅުވި އެވެ.
ރައީސްގެ ވާހަކަފުޅުގައި، ރާއްޖޭގައި ޒަމާނުއްސުރެ ރަށްރަށުގެ ރައްޔިތުންނާއި، އެރަށްރަށް ހިންގަވަން ތިއްބެވި ވެރިން ކުރައްވާފައިވާ މަސައްކަތްތަކުގެ ސަބަބުން އެރަށްރަށަށް ވަރަށްބޮޑު ކުރިއެރުންތަކެއް ލިބިފައިވާކަން ވެސް ފާހަގަ ކުރެއްވި އެވެ.
މި ރޮނގުން ވާހަކަފުޅު ދައްކަވަމުން، އެކުވެރިކަމާއި އެއްބާރުލުން އޮވެ، ޙަރަކާތްތެރި ރައްޔިތުން ތިބޭ ތަނެއްގައި، ތަރައްޤީގެ ކަންކަން ކުރިއަށް ގޮސްފައިވާ ކަމަށާއި، އެގޮތުން ފާހަގަކޮށްލެވޭ ރަށްރަށް ރާއްޖޭގައި އެބަހުރި ކަމުގައި ރައީސް ވިދާޅުވި އެވެ.
އަދި ހުރައަކީ މިފަދަ ނަމޫނާ ރަށެއް ކަމަށާއި، ތަފާތު ފިކުރުތަކުގެ ބޭފުޅުން ރަށުގައި އުޅުއްވި ނަމަވެސް، ފެންނަމުން ދަނީ ރަށުގެ އެކި ކަންކަމުގައި، ރަށުގެ ތަރައްޤީއަށްޓަކައި އެކީގައި މަސައްކަތް ކުރައްވަމުން ގެންދަވާ ތަން ކަމުގައި ރައީސް ވިދާޅުވި އެވެ.
ރައީސްގެ ވާހަކަފުޅުގައި، އެމަނިކުފާނު މަޤާމާ ޙަވާލުވެވަޑައިގެންނެވި އިރު، ރާއްޖޭގެ ޙާލަތު އޮތްގޮތުގެ މައްޗަށް ބައްލަވާލައްވައި، މި ވޭތުވެ ދިޔަ ތާނގައި ކުރެއްވި މަސައްކަތްތަކުގެ ސަބަބުން މިއަދު ޤައުމުގައި ވަނީ ހަމަޖެހުން ޤާއިމް ކުރެވިފައި ކަމުގައި ވިދާޅުވި އެވެ. މިއަދު ސިޔާސީ ހުރިހާ ބޭފުޅުންގެ ވިސްނުންފުޅު ހުރީ އިންތިޚާބަށް ކަމަށާއި، އެއީ އެކަން އޮންނަން ވާނެ ގޮތް ކަމުގައި ރައީސް ވިދާޅުވި އެވެ.