މަސްތުވާތަކެތި ގެންގުޅުނު މީދޫ މީހަކު ބައިލައްކަ ރުފިޔާއިން ޖޫރިމަނާކޮށް 10 އަހަރަށް ޖަލަށް ލުމަށް މީދޫ މެޖިސްޓްރޭޓް ކޯޓުން ހުކުމްކޮށްފިއެވެ.
މަސްތުވާތަކެތި ޓްރެފިކް ކުރުމުގެ ކުށް ސާބިތުވެގެން ޖޫރިމަނާކޮށް ޖަލަށް ލުމަށް ހުކުމް އިއްވާފައިވަނީ، ސ.މީދޫ/ނިރު، އަޙްމަދު ފަރުޙީންގެ މައްޗަށެވެ.
ފަރުޙީންގެ ފުލުހުންގެ ބެލުމުގެ ދަށަށް ގެންގޮސްފައިވަނީ، މި އަހަރުގެ ޖެނުއަރީ މަހުގެ 17 ވަނަ ދުވަހުގެ ދަންވަރު، ހުޅުމީދޫ ޕޮލިސް ސްޓޭޝަނުން ހިންގި އޮޕަރޭޝަނެއްގައެވެ. ފަރުހީންގެ އަތުން މަސްތުވާތަކެތި ފެނިފައިވަނީ، ފުލުހުންނަށް ލިބުނު އިންޓެލިޖެންސް މައުލޫމާތަކާއި ގުޅިގެން އޭނާ ހައްޔަރުކޮށް ބިޑި އަޅުވަން އުޅެނިކޮށް އޭނާގެ އަތުންނެވެ.
މީދޫ މެޖިސްޓްރޭޓް ކޯޓުން އިއްވި ހުކުމްގައި ބުނެފައިވާ ގޮތުން، ފަރުހީން ވަނީ އޭނާގެ މައްޗަށް ކުރި ދައުވާއަށް ޝަރީޢަތުގެ މަޖިލީހުގައި އިއުތިރާފްވެފައެވެ.