ކުރީގެ ރައީސް މުޙައްމަދު ނަޝީދަށް ރިޔާސީ އިންތިޚާބުގައި ވާދަކުރެއްވުމުގެ ފުރުސަތު ލިބޭނެ ކަމަށް ދެކެވޭ ވާހަކަތަކަށް ފޭދޫ ދާއިރާގެ މަޖިލިސް މެންބަރު އިބްރާހިމްދީދީ(އައިބީ) ވަރުގަދަ ރައްދެއް ދެއްވައިފިއެވެ.
ޗެނަލް13ގެ ނިއުސްޓޯކް ޕްރޮގްރާމްގައި ވާހަކަ ދައްކަވަމުން އައިބީ ވިދާޅުވި ގޮތުގައި ރައީސް ނަޝީދު ހުންނެވީ، ނަނާ ހުވަފެންފުޅެއްގައެވެ.
ރައީސް މުހައްމަދު ނަޝީދަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުން އައިބީ ވިދާޅުވީ، "ނަޝީދަށް ވެރިކަމަށް އަންނާކަށް ލާހިކައެއް ނޫން" ކަމަށެވެ.
"(ރައީސް ނަޝީދަށް)ވެރިކަމަށް އަންނާކަށް ލާހިކައެއް ނޫން، އައިސްބަލަ؟" އައިބީ ވިދާޅުވިއެވެ.
އައިބީ ވިދާޅުވި ގޮތުގައި، ނަޝީދު ވެރިކަމަށް ކުރިމަތިލެވޭ ގޮތަށް ޤާނޫނުތަކަށް ބަދަލު ގެންނަން ޕީޕީޢެމް އެއްވެސް މަޖިލިސް މެންބަރަކު ވޯޓު ނުދެއްވާނެ ކަމަށެވެ.
މީގެ އިތުރުން އައިބީ ވަނީ ރައީސް ނަޝީދަކީ "މަކަރުވެރި އަދި ޙީލަތްތެރި" ބޭފުޅެއް ކަމަށް ތަކުރާރުކޮށް ވިދާޅުވެފައެވެ. އައިބީ ވިދާޅުވި ގޮތުގައި ނަޝީދު އަލުން ވެރިކަމަށް ވަޑައިގަތުމުގެ އެއްވެސް ފުރުސަތެއް ނެތުމުން، އެވާހަކަ ދެއްކުމުގެ ބޭނުމެއް ނެތެވެ.