ރައީސް އަބްދުﷲ ޔާމީނަށް ތާއީދުކޮށް ޓްވީޓު ކުރާ ކޯޑިނޭޓަރަކު މިއަދު ކޮށްލި ޓްވީޓެކެވެ. އެ ޓްވީޓުގައި ބުނެފައިވާ ގޮތުގައި އައްޑޫ ރައްޔިތުންނަކީ ޝުކުރުވެރިވާން ނުދަންނަ ބައެކެވެ. އައްޑޫގެ މަގު ހަދަން އެތައް މިލިއަން ރުފިޔާއެއް ކޮންމެ އަހަރަކު ބަޖެޓުގައި ހިމަނާއިރު ވެސް ޝަކުވާ ކުރާތީ އެ ކޯޑިނޭޓަރު ހިތްހަމަނުޖެހުނީއެވެ.
އެއީ ކޯޑިނޭޓަރުގެ ޚިޔާލު ފާޅުކުރުމުގެ މިނިވަންކަމެވެ. އަތްޖަހާ އޮޅިއަށް ނިސްބަތްވުމުން ކަމުގެ ހަގީގަތް އޮޅުވާލަން މަސައްކަތް ކުރީ ކަމެއް ނުވަތަ ހަގީގަތުގައި ވެސް އެ ކޯޑިނޭޓަރަށް ހަގީގަތް ނޭނގެނީ ކަމަށް ވެސް ވެދާނެއެވެ.
ރައީސް އަބްދުﷲ ޔާމީން ވެރިކަމަށް ވަޑައިގެންނެވި ފަހުން ދައުލަތުގެ ބަޖެޓް ފާސްކުރާ ކޮންމެ ފަހަރަކު އައްޑޫގެ މަގުތައް ރަނގަޅު ފެންވަރަކަށް ހެދުމަށް ބޭނުންވާ ފައިސާ ހިމަނައެވެ. ބަޖެޓަށް ވޯޓަށް އެހުމަށް ތައްޔާރުވަމުން ގެންދާއިރު، އެވާހަކަތައް ވަރަށް ބާރަށް ދެކެވެއެވެ. އެހެނަސް ދުވަސްކޮޅަކުން އެއީ ނުދައްކާ ވާހަކައަށް ވެގެން ދަނީއެވެ.
2017 ވަނަ އަހަރުގެ ބަޖެޓް ފާސްކުރި އިރު ވެސް އައްޑޫގެ މަގުހެދުމުގެ މަޝްރޫޢަށް ކަމަށް ބުނެ ދައުލަތުގެ ބަޖެޓުގައި އަދަދުތަކެއް ހިމެނިއެވެ. ލޯކަލް ކައުންސިލް އިންތިހާބާއި ދިމާކޮށް، ހައުސިން މިނިސްޓަރު ކުރެއްވި ޓްވީޓެއްގައި ކުރެއްވި ޓްވީޓެއްގައި ވިދާޅުވީ އައްޑޫގެ މަގު ހެދުން ލަންކާގެ ސިއެރާ ކުންފުންޏާއި ހަވާލު ކުރުމަށް ސަރުކާރުން ނިންމާފައިވާކަމަށް ވިދާޅުވިއެވެ.
އޭގެ 5 މަސް ފަހުން އަނެއްކާވެސް ހަމަ އެ ވާހަކަތައް މުއިއްޒު ތަކުރާރުކުރެއްވިއެވެ. 2017 ވަނަ އަހަރުގެ އޮކްޓޯބަރު މަހު އައްޑޫގައި ބޭއްވި ޖަލްސާއެއްގައި މުއިއްޒު ވިދާޅުވީ، "އައްޑޫގެ މަގުތައް ހަދަން ސްރީ ލަންކާގެ ސިއެރާ ކުންފުންޏާ ޙަވާލުކުރަން ނިންމާފައިވާ ކަމަށާއި އެ މަސައްކަތް ވަރަށް އަވަހަށް ފަށާނެ" ކަމަށެވެ.
"ވަރަށް އަވަހަށް ފަށާނެ" ކަމަށް މުއިއްޒު ވިދާޅުވި ފަހުން އެތައް ދުވަހެއް ފާއިތުވެގެން ދިޔައިރު ވެސް އައްޑޫގެ މަގު ހެދުމުގެ މަޝްރޫޢު ނުފެށެއެވެ. ރައީސް ޔާމީންގެ ދައުރު ނިމުމުގެ ކުރިން އައްޑޫގެ ހެދުމުގެ މަޝްރޫޢު ފެށޭނެ ކަމުގެ އެއްވެސް ޔަޤީންކަމެއް ނެތެވެ.
މަގު ހެދުމުގެ މަޝްރޫޢު ފެށޭނެ ކަމާއި މެދު ސުވާލު އުފައްދަން ޖެހޭ އެހެން ސަބަބުތައް ވެސް އެބަހުއްޓެވެ. އައްޑޫގައި ހުރި މަގު ހަދަން ބޭނުންކުރާ އެތައް ސާމާނެއް ވެސް ރައީސް ޔާމީންގެ ސަރުކާރުގައި އައްޑޫން ބޭރުކޮށްފިއެވެ. ކުޑަ ދުވަސްކޮޅަކުން ގެންނާނެ ކަމުގެ ވައުދު ވުމަށް ފަހުގައެވެ. އެހެނަސް އެތަކެތި ވީ ތަނެއް އަދި ގެންދިޔަ ތަނެއް އެނގޭ މީހަކު ވެސް މިހާރު ނެތެވެ.
އައްޑޫގެ ރައްޔިތުން ޝަކުވާބޮޑު އަދި ޝުކުރުވެރިނުވާ ބައެއްކަމުގައި ސަރުކާރުގެ ކޯޑިނޭޓަރުން ލޭބަލް ކުރަންޏާ ކުރަންވީއެވެ.
އައްޑޫގެ މަގުތަކުގެ ޙާލަތު ވަޒަން ކުރެވޭނީ އެމަގުން ދަތުރުކުރާ އައްޑޫ މީހާއަށެވެ. ފަރުބަދަމަތިން ދަތުރުކުރާކަމުގެ އިހްސާސް ކުރަންޖެހެނީ އައްޑޫ ރައްޔިތުންނެވެ. މަގުތަކުގެ އަޑިގުޑަންކަމާއިއެކު ވާރޭ ވެހިއްޖެނަމަ، ދުއްވާ އެއްޗަކަށް ހިނގާ ބިނގާވެ އުޅޭމީހަކަށްވެސް ސަލާމަތެއް ނެތްކަން މި އައްޑޫގެ އެންމެން ދަންނަ ހަގީގަތެކެވެ.