މަޝްހޫރު މީހުން ކުރާ ކަންތައް ތަކަކީ ހުރިހާ މުޖްތަމަޢު ތަކެއްގައި ވެސް ގިނަ ބަޔަކު ނަމޫނާއެއްގެ ގޮތުގައި ބަލާ ކަންކަމެވެ. އެމީހުންގެ އަމަލުތައް ރަގަޅަށް ބަހައްޓަން ޖެހެނީ އެހެންވެގެންނެވެ. ޤާނޫނާއި ޤަވާއިދުތަކަށް އެމީހުން ބޯލަނބަން ޚާއްސަ އިސްކަމެއް ދޭންޖެހޭ ސަބަބަކީ ވެސް އެއެވެ.
މޯލްޑިވިއަން އައިޑަލް ސީޒަން އެކެއްގެ އެންމެ މޮޅު ތިން ބައިވެރިންގެ ތެރޭގައި ހިމެނުނު ޝަލަބީ އިބްރާހިމް އަކީ އެ ޝޯއަށް ފަހު ވެސް ގިނަ ބައެއްގެ މަޤްބޫލްކަން ހޯދާފައިވާ ފަރާތެކެވެ. ދިރާގު ބްރޭންޑް އެމްބެސެޑަރ ޝަލަބީ ދާ ކޮންމެ ރަށަކުން އޭނާއަށް ލިބޭ ތަރުޙީބުން އެކަން ހާމަވެގެން ދެއެވެ.
މަޝްހޫރު ހުރިހާ މީހުން ވެސް ގޯސް ހަދާ އުސޫލުން، ލަވަކިޔުންތެރިޔާ ޝަލަބީ އަށް ވެސް މިފަހަރު މިއޮތީ ގޯސް ހެދިފައެވެ.އައްޑޫގައި ހިމާޔަތްކޮށްފައިވާ އީދިގަލި ކުޅީގެ ޕްލެޓްފޯމެއްގެ މައްޗަށް ކޮޅަށް އަރާ ހުރެ ޝަލަބީ ނެގި ފޮޓޯ އަަކުންނެވެ.
މުވާސަލާތީ ބޮޑު ކުންފުންޏެއްގެ ބްރޭންޑް އެމްބެސެޑަރަކަށް ވެ ހުރެ،ޝަލަބީ އަށް ޢަމަލު ކުރެވުނު ގޮތް ހަމަ ހަގީގަތުގައި ވެސް ގިނަ ބަޔަކަށް ކަޑަ ވެއްޖެއެވެ. އެކަމާއި ގިނަ ބަޔަކު ދަނީ ހިތްހަމަ ނުޖެހުން ފާޅުކުރަމުންނެވެ.
އެފަރާތްތަކުން ބުނާ ގޮތުގައި، ޝަލަބީ އެފަދަ ގޮތަކަށް އަމަލު ކުރުމުން، އެ ދެވުނީ ވަރަށް ގޯސް މެސެޖެކެވެ. އެމީހުން އުފައްދާ ސުވާލަކީ، މާދަމާ ޝަލަބީގެ ހުރިހާ ސަޕޯޓަރުން ޕްލެޓް ފޯމުގެ މައްޗަށް އެހެން އަރަން ދީމާކޮށްފާނެ ނޫން ހެއްޔެވެ؟
ޝަލަބީ ޕްލެޓްފޯމުގެ ފާރުގެ މައްޗަށް ކޮޅަށް އަރައި ފޮޓޯ ނެގި މައްސަލައިގައި މޯލްޑިވްސް އެންޖީއޯ ފެޑެރޭޝަންގެ ރައީސް އަހްމަދް ނިޒާމް ވެސް ވަނީ ކަންބޮޑުވުން ފާޅުކުރައްވާފައެވެ. ފޭސްބުކްގައި ކުރެއްވި ޕޯސްޓެއްގައި ނިޒާމް ވަނީ، "މީހާ އަދި ކިތަންމެ މަޝްހޫރު ވިޔަސް އެހެން މީހުންނަށާއި ތަންތަނަށް އިހްތިރާމް ކުރަން ޖެހޭނެ" ކަމަށް ވިދާޅުވެފައެވެ.
މި މައްސަލައިގައި ޝަލަބީގެ ބައެއް ސަޕޯޓަރުން އޭނާގެ ދިފާއުގައި ނިކުމެފައިވާއިރު، އެމީހުން ދަނީ އެއީ މައްސަލައެއް ނޫންކަމަށް ފާހަގަކުރަމުންނެވެ. އެ ފަރާތްތަކުން ބުނަމުން ގެންދަނީ، ޝަލަބީ އަކީ ޕްލެޓްފޯމުގެ މައްޗަށް އެގޮތަށް އެރި ފުރަތަމަ މީހާ ނޫން ކަމަށެވެ. އަދި އޭނާ އެތަނަށް އަރާހުރީ ގެއްލުމެއް ދިނުމުގެ ބޭނުމުގައި ނޫންކަމަށް އެމީހުން ބުނެއެވެ.
އީދިގަލި ކިޅީގެ ޕްލެޓްފޯމްގެ މައްޗަށް މީގެ ކުރިން ވެސް ސައިކަލުތައް އެރުވުމާއި، އެތަނަށް ގެއްލުން ދިނުން ފަދަ ކަންތައް ހިނގާތާ އެތައް ދުވަހެއް ވެއްޖެއެވެ. އެފަދަ ކަންތައް ކުރި ބައެއް މީހުންނަށް، ފުލުހުންނާއި އެންވަޔަރަމަންޓް ޕްރޮޓެކްޝަން އޭޖެންސީން ނަސޭޙަތްދީފައިވެއެވެ.
އެހެން ނަމަވެސް މިފަހަރު ޝަލަބީ އެތަނަށް އަރައި ފޮޓޯ ނެގުމުން ގިނަބައެއްގެ ފާޑުކިޔުން އަމާޒުމިވީ، ޝަލަބީ އަކީ އެހެން މީހުންނަށް މިސާލު ދެއްކޭ ފަދަ މަޝްހޫރު ޝަޚްސިއްޔަތަކަށް ވެ ހުރެ އެފަދަ އަމަލެއް ކުރުމުންނެވެ.
ފަހަރެއްގައި މިއީ ޝަލަބީއަށް ނޭނގި ކުރެވުނު ކަމަކަށް ވެދާނެއެވެ. ނަމަވެސް މިފަހަރު ގިނަ ބަޔަކަށް ޝަލަބީ އަށް ކަންތައް ކުރެވުނު ގޮތް ކަޑަ ވެއްޖެއެވެ.