އިދިކޮޅު އެމްޑީޕީގެ ދިދައިގައި ހުންނަ ކުލައަކީ ފާދިރީންނަށް ނިސްބަތްވާ ކުލައެއް ކަމަށް ދޭހަވާ މޭރުމަކުން ހޯމް މިނިސްޓަރ އަހްމަދް އަޒްލީން ވިދާޅުވެއްޖެއެވެ.
އަޒްލީން މިފަދަ މޭރުމަކުން ވާހަކަ ދައްކަވާފައި ވަނީ މިރޭ ޕީޕީއެމްގެ ޖަލްސާއެއްގައި ވާހަކަ ދައްކަވަމުންނެވެ.
ރާއްޖޭގެ އެކި ކަންކޮޅުތަކުގައި މިފަހަކަށް އައިސް އެމްޑީޕީގެ ސަޕޯޓަރުން ގެންދަނީ، ދިދަތައް ނަގަމުންނެވެ. އަދި އެ ދިދަތައް ހުންނަނީ ގައުމީ ދިދައަށް ވުރެ މާ އުހުގައި ކަމަށް ބުނެ ފުލުހުން ގެންދަނީ އެ ދިދަތައް ނަގަމުންނެވެ.
"ކިހިނެތް ވެގެންތޯ އަޅުގަނޑުމެންގެ ފާދިރީންނަށް ނިސްބަތްވާ ދިދައެއް، ދިދައަށް ވުރެ މައްޗަށް ނެގެންވީ." އެމްޑީޕީގެ ދިދަތައް ނަގަމުންދާ މައްސަލައަށް އިޝާރާތް ކުރައްވައި އަޒްލީން ވިދާޅުވިއެވެ.
ސީދާ އެމްޑީޕީގެ ނަން ވިދާޅުނުވި ނަމަވެސް، އަޒްލީން ވަނީ ބައެއް މީހުންގެ ދިދަތައް ރާއްޖޭގައި ހުރި އެންމެ އުސް ގަހުގެ ކުރިއަށް ނަގަމުން ގެންދާ ކަމަށާއި އެކަން ކުރަނީ، ދާޚިލީ ވުޒާރާއިން ނެރެފައިވާ އުސޫލާއި ޚިލާފަށް ކަމަށް ވިދާޅުވެފައެވެ.
އަދި އެގޮތަށް ދިދަ ނެގުމަށް ފަހު ބައިނަލްއަޤްވާމީ ފަރާތަކަށް ފޮޓޯ ފޮނުވައި، ރާއްޖޭގައި އެންމެ ބޮޑު ދިދަ އަކީ އެއީ ކަމަށް ބުނަމުން ގެންދާ ކަމަށެވެ. އޭގެ ސަބަބުން "އަޅުގަނޑުމެންނަށް އެންމެން ކުޅުޖަހަނީ" ކަމަށެވެ.