ދިވެހިރާއްޖޭގެ ފަޅުތަކާއި ގިރިތަކާއި ރަށްތައް ތެޔޮވަޅުތަކަށް ވެއްޖެ ކަމަށް އިކޮނޮމިކް މިނިސްޓަރ ސައީދު ވިދާޅުވެއްޖެއެވެ.
ޕީޕީއެމް އިން ރޭ ބޭއްވި ޖަލްސާއެއްގައި ވާހަކަ ދައްކަވަމުން މިނިސްޓަރ ސައީދު ވިދާޅުވި ގޮތުގައި، މިއަދުގެ ސަރުކާރުގެ ސިޔާސަތުތަކުގެ ސަބަބުން ރާއްޖޭގެ ޖަޒީރާ ރަށްތައް، މަންފާ ލިބޭފަދަ "ތެޔޮވަޅުތަކަށް" ބަދަލުވަމުންދާކަމަށެވެ.
އެހެން ނަމަވެސް މީގެ ކުރިން ރާއްޖޭގައި ވެރިކަން ކުރި ސަރުކާރުތަކަށް ރަށްތަކާއި ފަޅުތައް އަދި ގިރިތަކުން އިޤްތިޞާދީ މަންފާ ހޯދައިދިނުމަށް ނޭނގުނު ކަމަށެވެ. އަދި އޭގެ ސަބަބުން މާޒީގައި ރާއްޖެ ވެގެން ގޮސްފައިވަނީ ސަލާންޖަހަން ޖެހިފައިވާ ފަޤީރު ރަށްތަކެއްގެ ގޮތުގައި ކަަމަށް ސައީދު ވިދާޅުވިއެވެ.
"މިއަދު ފަޅުތަކާއި ގިރިތަކާއި ރަށްތަކާއި ޖަޒީރާތައް ވެއްޖެ އަޅުގަނޑުމެންގެ ތެޔޮވަޅުތަކަށް" މިނިސްޓަރ ސައީދު ވިދާޅުވިއެވެ
މީގެ އިތުރުން ސައީދު ވިދާޅުވީ، ރާއިސް ޔާމީންގެ ވެރިކަމުގައި އިގްތިސޯދީ ގޮތުން ބޮޑު ކުރިއެރުމެއް ގެނެސްދީފައިވާ ކަމަށެވެ. އެހެންވެ އެމަނިކުފާނު 2 ވަނަ ދައުރަކަށް ހޮވިގެން ދިއުމަކީ، ދިވެހިންނަށް ލިބޭނެ އެންމެ ބޮޑު ނަސީބު ކަމަށެވެ.
ރައީސް ޔާމީނަށް އަބަދުވެސް ހުޝާމަދުކޮށް ވާހަކަ ދައްކަވަމުން ގެންދަވާ މިނިސްޓަރ ސައީދު ރޭގެ ޖަލްސާގައި ވެސް ވަނީ އެމޭރުމުން ވާހަކަ ދައްކަވާފައެވެ. އެގޮތުން ސައީދު ވިދާޅުވި ގޮތުގައި ރައީސް ޔާމީނަކީ ދިރިހުރި ދިވެހި ބަތަލެއް ކަމަށެވެ.