ސ. ހިތަދޫ ހަތް ގެއަކުން ވައްކަން ކުރިކަމަކަށް ތުހުމަތު ކުރެވޭ ދެ މީހަކު ފުލުހުންގެ ބެލުމުގެ ދަށަށް ގެންގޮސް، ވަގަށް ނަގާފައިވާ ގިނަ އަދަދެއްގެ ތަކެތި ހިތަދޫ ޕޮލިސް ސްޓޭޝަނުން ހޯދައިފި އެވެ.
މި މައްސަލަ އާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައި ވަނީ އުމުރުން 32 އަހަރާއި 43 އަހަރުގެ ދެ ފިރިހެނުންނެވެ.
މި މަހު 17 ވަނަ ދުވަހުގެ ރޭ ދަންވަރުގެ ވަގުތެއްގައި ހިތަދޫ ބައެއް ގޭގެއިން ވައްކަން ކޮށްފައިވާ ކަމަށް ފުލުހުންނަށް ހުށަހެޅު މައްސަލަ އާ ގުޅިގެން ފުލުހުން އެ ސަރަހައްދަށް ގޮސް ކުރި މަސައްކަތުން ވައްކަން ކުރި ކަމަށް ތުހުމަތު ކުރެވޭ އުމުރުން 32 އަހަރުގެ މީހާ ފުލުހުންގެ ބެލުމުގެ ދަށަށް ގެންގޮިސްފައި ވަނީ އޭނާ ވައްކަން ކުރަމުން ދަނިކޮށެވެ.
ހިތަދޫ ހަތް ގެއަކުން ގެއްލިފައި ވަނީ ލެޕްޓޮޕަކާއި އައިޕެޑެއްގެ އިތުރުން ގޭސް ފުޅިތަކާއި ގޭސް އުނދުނާއި ވަޑާން ކުރުމަށް ބޭނުންކުރާ އާލާތްތަކާއި އަންނައުނާއި ގޭތެރޭގައި ހިފާގެންގުޅުމަށް ބޭނުން ކުރާ ބައެއް ސާމާނުތަކުގެ އިތުރުން ބަގީޗާގެ ގޮތުގައި ހައްދާފައި ހުރި ގަސްތަކެކެވެ.
މިތަކެތީގެ ތެރެއިން އައިޕެޑް ފިޔަވައި އެހެން ހުރިހައި ތަކެތި ފުލުހުން ހޯދާފައިވަނީ ހިތަދޫ ވަލުުތެރޭގައި ފޮރުވާފައި ހުއްޓައެވެ.