އައްޑޫގެ ގުޅިފައިވާ އަވަށްތަކުގެ މަގުތަކުގެ ހާލަތު ދަށްވުމުގެ ޝަކުވާ ރައްޔިތުން ކުރަމުން ގެންދާތާ އެތައް ދުވަހެއް މިވަނީ ވެގެން ގޮސްފައެވެ. އެހެން ނަމަވެސް އެ ޝަކުވާތަކުގެ އަޑުއަހައި މަގުތައް ރަނގަޅު ކުރުމަށް އެއްވެސް ސަރުކާރަކަށް އެކަށީގެންވާ މަސައްކަތެއް ކުރެވިފައެއް ނުވެއެވެ.
ފޮޓޯއިން ތިޔަ ފެނިވަޑައިގަންނަވަނީ، އައްޑޫ ސިޓީ ހިތަދޫ، ޑެއިޒީ މަގެވެ. ހިތަދޫގެ މަޝްހޫރު "މެނަން ކްލިނިކް" އަށް ދާން އޮންނަ މަގެވެ.
މި ފޮޓޯ ސޯޝަލް މީޑިޔާގައި ހިއްސާކުރި މީހާ ބުނެފައިވަނީ އައްޑޫގެ މަގުތަކުގެ ހާލަތު ރަނގަޅު ކުރުމަށް އެއްވެސް ސަރުކާރަކަށް މަސައްކަތް ކުރެވިފައި ނުވާކަން ހަމައެކަނި މި ފޮޓޯއިން ވެސް އެނގޭ ކަމަށެވެ.
"މެނަން ކްލިނިކާއި ދިމާލަށް މި ފެންގަނޑު ނޯންނަ އިރެއް އަހަރެން ހަނދާނެއް ނެތް. މަގޭ އުމުރުން 45 އަހަރު" އޭ
އައްޑޫގެ ގުޅިފައިވާ އަވަށްތަކުގައި މިގޮތަށް އެއްވެސް ސަރުކާރަކަށް ހިންދާ ނުލެވުނު އެތައް ފެންގަނޑުތަކެއް އެބަހުއްޓެވެ. ޔަގީންވާ ކަމަކީ، ރައީސް މައުމޫން، ރައީސް ނަޝީދު، ރައީސް ވަހީދު އަދި ރައީސް ޔާމީންގެ ސަރުކާރަށް ވެސް މި ފެންގަނޑު ހަމަ ހިންދާނުލެވުނުކަމެވެ.
އެކި އަވަށްތަކުގެ ބައެއް މަގުތަކުގައި މިފަދަ ފެންގަޑުތައް ހެދި ހަރުލާފައި ހުރުމުގެ ސަބަބުން މަގުތައް ބޭނުން ނުކުރެވި ވިނަ ހެދިފައިވެސް އެބަހުއްޓެވެ. ނަމަވެސް މިފަދަ މަގުތަކުން ފެންގަނޑު ހިންދައި، މަގު ލެވެލްކޮށް، އެފަދަ މަގުތައް ބޭނުން ކުރެވޭ ގޮތް ހެދުމަށް މީގެ ކުރިން ކައުންސިލް، އަދި ފަހުން އެމްއާރްޑީސީ، އޭގެ ފަހުން ހައުސިން މިނިސްޓްރީއަށް އެކަށީގެންވާ ގޮތަށް ކުރެވޭތަނެއް ނުފެނެއެވެ.