ފެނަކަ ކޯޕަރޭޝަނުން އެޕްރީލް މަހުގެ ކަރަންޓު ބިލް ތައްޔާރު ކުރުމުގައި މަކަރު ހެދިކަމަށް ބުނެ ކުރަމުން ގެންދާ ތުހުމަތުތައް އެކުންފުނިން އިން އެކަން ދޮގުކޮށްފިއެވެ.
ފެނަކައިން ކަރަންޓު ބިލް ހެދުމުގައި އޮލުވާލާފައިވާ ކަމަށް ގިނަ ބަޔަކު ތުހުމަތު ކޮށްފައި ވަނީ އެކުންފުނިން ކަރަންޓުގެ އަގު ހެޔޮކޮށްފައި ވަނިކޮށް މާޗް މަހާއި އަޅާ ބަލާއިރު އެޕްރީލް މަހުގެ ކަރަންޓު ބިލް ބޮޑުވުމުންނެވެ.
މިއަދު ފެނަކައިން ބޭއްވި ނޫސްކޮންފަރެންސެއްގައި ވާހަކަ ދައްކަވަމުން ފެނަކަ ކޯޕަރޭޝަންގެ މެނޭޖަރު އަހްމަދު ނަޖާހު ވިދާޅުވީ، އެއްވެސް އިރަކު ބިލް ތައްޔާރުކުރުމުގައި ރައްޔިތުންނަށް އޮޅުވާލައިފާ ނުވާނެކަމަށާ އަރައިގެން އުޅެނީ އޮޅުންތަކެއް ކަމަށެވެ.
ފެނަކައިން ބުނެފައިވާ ގޮތުގައި އޭޕްރިލް މަހުގެ ބިލު ލިބުމާއި އެކު ގިނަ އަދަދެއްގެ ޝަކުވާތައް އެ ކުންފުންޏަށް ވަނީ ލިބިފައެވެ.
މިއަދުގެ ނޫސްވެރިންގެ ބައްދަލުވުމުގައި ފެނަކައިން ވަނީ މީގެ ކުރިން ވެސް ކަރަންޓު ބިލް ބޮޑުވުމުގެ ޝަކުވާ އިތުރުވުމުން އެކުންފުނިން ދައްކާ ވާހަކަތައް ތަކުރާރުކޮށްފައެވެ. އެގޮތުން ފެނަކައިން ބުނެފައިވަނީ، މި ދުވަސްވަރަކީ އަބަދުވެސް ކަރަންޓު ބިލް ބޮޑުވުމުގެ ޝަކުވާ އިތުރުވާ ދުވަސްވަރެއް ކަމަށެވެ. އަދި އެހެން އެކަން ދިމާވަނީ މާގިނައިން ކަރަންޓު ބޭނުންކުރެވޭތީ ކަމަށް ފެނަކައިން ވަނީ ބުނެފައެވެ.
ފެނަކައިން ބުނެފައިވާ ގޮތުގައި، ބިލްތައް ބޮޑުވެގެން ޚާއްޞަކޮށް އެންމެ ބޮޑަށް ފާހަގަކުރެވޭނީ އޭސީ ކޮށްފައި ހުންނަ ގޭބިސީތަކުގައި ކަމަށެވެ. އަދި ކަރަންޓު ބިލް ބޮޑުވެފައި ވަނީ ޓެރިފަށް ގެނައި ބަދަލަކުން ނޫންކަމަށް ފެނަކައިން ވަނީ ބުނެފައެވެ.