އެންޓި ކޮރަޕްޝަން ކޮމިޝަނުގެ ރައީސް ޙަސަން ލުތުފީ ފުލުހުންގެ ތަހުގީގަކަށް ދީފައިވާ ބަޔާނެއް ސޯޝަލް މީޑިޔާގައި ލީކުކޮށްލައިފިއެވެ.
ބެލެވޭގޮތުގައި މި ބަޔާނަކީ، 1 ފެބްރުއަރީގައި ސުޕްރީމް ކޯޓުން ނެރުނު އަމުރާއި ގުޅޭގޮތުން ފުލުހުން ކުރަމުން ގެންދާ ތަހުގީގަށް ލުތުފީ ދެއްވާފައިވާ ބަޔާނެކެވެ. އެހެން ނަމަވެސް މިއީ ސައްހަ ބަޔާނެއް ކަމެއް ނުވަތަ ނޫންކަމެއް ފުލުހުން އަދި ރަސްމީ އެއްވެސް އިދާރާއަކުން ބުނެފައެއް ނުވެއެވެ.
ސޯޝަލް މީޑިޔާގައި ލީކުކޮށްލާފައިވާ ބަޔާނުގައި އޭސީސީގެ ރައީސް މެލޭޝިޔާގައި ސުޕްރީމް ކޯޓުގެ ފަނޑިޔާރު އަލީ ހަމީދު އާއި ބައްދަލުކޮށް ހިނގައިދިޔަ ކަންތަކެއްގެ ވާހަކަ ވަނީ ކިޔައިދީފައެވެ.
އަދި މީގެ އިތުރުން އެ ބަޔާނުގައި، ސުޕްރީމް ކޯޓު ތެރެއިން ސަރުކާރު ވައްޓާލަން އުޅޭކަމުގެ އަޑުތަކެއް އިވިގެން ފަނޑިޔާރު އަލީ ހަމީދަށް އިންޒާރު ދީފައިވާނެ ކަމަށް ވެސް ލުތުފީ ވިދާޅުވެފައިވެއެވެ. އެގޮތުން އަދި ރައީސް ޔާމީނަކީ ކާކުކަން ދަންނަން ޖެހޭނެ ކަމަށް ވިދާޅުވެފައިވާ ކަމަށް ލުތުފީގެ ބަޔާނުގައި ވެއެވެ.