ފެބްރުއަރީ މަހުގެ 1 ވަނަ ދުވަހުގެ ރޭ ސުޕްރީމް ކޯޓުން އަމުރު ނެރުނުއިރު އޭސީސީގެ ރައީސް ޙަސަން ލުތުފީ ހުންނެވީ ހިންދީ ފިލްމް "ޕަދްމަވަތު" ބައްލަވަން ހުޅުމާލޭގެ ސިނަމާއެއްގައި ކަމަށް އޭނާ ވިދާޅުވެއްޖެއެވެ.
ލުތުފީ މިގޮތަށް ވިދާޅުވެފައި ވަނީ، ފުލުސް އޮފީހަށް ދެއްވި ބަޔާނެއްގައެވެ.
ސޯޝަލް މީޑިޔާގައި ލީކުކޮށްލާފައިވާ ބަޔާނުގައި ލުތުފީ ވިދާޅުވެފައިވާ ގޮތުގައި ފެބްރުއަރީ މަހުގެ 1 ވަނަ ދުވަހު އޮފީސް ނިންމާލުމަށްފަހު ވަޑައިގެންނެވީ ހުޅުމާލޭގައި ހުންން 'ޝްވެކް' ސިނަމާއަށެވެ.
އަދި ސުޕްރީމް ކޯޓުން އެދުވަހު ނެރުނު އަމުރާއި ގުޅޭގޮތުން މެސެޖްތައް ލިބިވަޑައިގެންނެވީ، ހިންދީ ފިލްމް "ޕަދްމަވަތު" ބައްލަވަން ހުންނަވަނިކޮށް ކަމަށާއި، އެ ވަގުތު ފަނޑިޔާރު އަލީ ހަމީދަށް ގުޅުއްވަން މަސައްކަތް ކުރެއްވި ކަމަށް ލުތުފީ ވަނީ ވިދާޅުވެފައެވެ.
"ސިނަމާގައި ހުއްޓާ ސުޕްރީމް ކޯޓުގެ ހުކުމާއި ގުޅިގެން މެސެޖްތައް އަންނަން ފެށުމުން ވަގުތުން ފަނޑިޔާރު އަލީ ހަމީދު މުހައްމަދު އާއި ހަސަން ސައީދު ހުސައިން އަށް "މިއީ ކޮންކަމެއް ހެއްޔޭ، އެހެންވީމާ އަޅުގަނޑު ދެއްކި ވާހަކަ އަކީ ހަމަ ތެދެއްދޯއޭ، އެކަމު ތިހާ މުނާފިގު ވާކަށް ނުވާނެއޭ" ބުނަން ފަނޑިޔާރު އަލީ ހަމީދު މުހައްމަދު އާއި ހަސަން ސައީދު ހުސައިން އަށް ގުޅޭތޯ ބެލީމެވެ.
ފުލުހުންނަށް ދެއްވި ބަޔާނުގައި ލުތުފީ ވިދާޅުވެފައިވާ ގޮތުގައި، އަލީ ހަމީދު ފޯނަށް ޖަވާބެއް ނުދެއްވައެވެ.