2018 ވަނަ އަހަރުގެ ރިޔާސީ އިންތިހާބުގައި ކުރީގެ ރައީސް މުޙައްމަދު ނަޝީދާއި ރައީސް އަބްދުﷲ ޔާމީން އާއި ދެބޭފުޅުން ވާދަކުރައްވާނަމަ ވޯޓު ދޭނެ ގޮތް އޮޅުން ފިލުވަން ޕީޕީއެމުން ސާވޭ އެއް ކުރަމުން އެބަގެންދެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ޕީޕީއެމްގެ ކެމްޕެއިން އޮފީހުގެ ފަރާތުން ގެންދަނީ ރާއްޖެ އާއި ރާއްޖެއިން ބޭރުގައި ތިބި ފަރާތްތަކަށް ގުޅައިގެން ވެސް އެކަން އޮޅުން ފިލުވުމަށް މަސައްކަތް ކުރަމުންނެވެ.
"ރިޔާސީ އިންތިހާބުގައި ހަމައެކަނި ވާދަކުރާ 2 ކެންޑިޑޭޓުންނަކީ ރައީސް ނަޝީދު އާއި ރައީސް ޔާމީނަށް ވެއްޖެ ނަމަ ވޯޓު ދެއްވާނީ ކޮންބޭފުޅަކަށްތޯ މިއަހަނީ." ޕީޕީއެމްގެ ކެމްޕެއިން އޮފީހުން ގުޅައިގެން ދެއްކި ވާހަކަތައް ހިއްސާ ކުރި ހިތަދޫ މީހަކު ބުންޏެވެ.
ރައީސް ނަޝީދުގެ ނަން ރިޔާސީ އިންތިހާބުގެ ވޯޓު ކަރުދާހުގައި އޮވެއްޖެ ނަމަ އަމަލުކުރާނެ ގޮތް ބެލުމަށް ޕީޕީއެމުން ސާވޭ ކުރަމުން ގެންދާއިރު، އެ ޕާޓީން ދަނީ އިންތިހާބުގައި ނަޝީދުގެ ނަން ނޯންނާނެ ކަމަށް ބުނަމުންނެވެ.