ހދ. ނޮޅިވަރަމްފަރުގައި ދުވަން ގޮސް އުޅުނު އަންހެނެއްގެ ގައިގައި ސައިކަލަކުން ޖެހި އަނިޔާވެއްޖެއެވެ.
މައުލޫމާތު ލިބިފައިވާ ގޮތުގައި މިހާދިސާ ހިނގާފައި ވަނީ ރޭގައެވެ. ނޮޅިވަރަމްފަރު ބަނދަރު ސަރަހައްދުން އަންހެންމީހާ ދުވެފައި ދަނިކޮށް އޭނާގެ ގައިގައި ސައިކަލަކުން ޖެހުމުގެ ސަބަބުން ވަނީ ބޯފަޅައިގެން ގޮސްފައިވެއެވެ.
އަންހެން މީހާއަށް ހދ.ކުޅުދުއްފުށީ ހޮސްޕިޓަލުގައި ފަރުވާ ދެމުން އަންނައިރު އޭނާގެ ހާލު މިހާރު ރަނގަޅު ކަމަށް އެ ހޮސްޕިޓަލުން މައުލޫމާތު ދެއްވައެވެ.
ކުޅުދުއްފުށީ ހޮސްޕިޓަލުން ވާހަކަ ދެއްކި އޮފިޝަލަކު ބުނިގޮތުގައި، އަންހެންމީހާގެ ބޯފަޅައިގެން ދިއުމުގެ އިތުރަށް އޭނާގެ ގައިގެ އެކިތަންތަނުން މަށައިގެން ގޮސްފައިވާ ކަމަށެވެ. އެހެން ނަމަވެސް އަންހެން މީހާޢަށް ސީރިއަސް އަނިޔާއެއް ނުލިބޭ ކަމަށް އޮފިޝަލް ބުންޏެވެ.