ދިވެހި ގައުމަށް އަންނަ ބަދަލުތަކުގެ ދިފާއުގައި ހުރިހާ ރައްޔިތުން ނިކުމެވަޑައިގަތުމަށް ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހިމް ގޮވާލައްވައިފި އެވެ.
ފަސްޓް ލޭޑީ ފާތިމަތު މިހެން ގޮވާލައްވާފައި ވަނީ ފުވައްމުލައް ސިޓީގައި ރޭ ބޭއްވި ޕީޕީއެމްގެ ޖަލްސާގައި ވާހަކަ ދައްކަވަމުންނެވެ. ރޭގެ ޖަލްސާގައި ފާތުން ވާހަކަ ދައްކަވާފައިވާއިރު، މިއީ ޕީޕީއެމްގެ ޖަލްސާއެއްގައި އެކަމަނާ ވާހަކަފުޅު ދެއްކެވި ފުރަތަމަ ފަހަރެވެ.
"އެކަލަސް، މިކަލަސް، ދެނަސް ރައީސް ޔާމީން" ނަމުގައި ބޭއްވި ޖަލްސާގައި ވާހަކަ ދައްކަވަމުން ފާތުން ވަނީ، އެންމެހާ ދިވެހި ރައްޔިތުން އެކަމަނާ އާއި އެކު ނިކުމެވަޑައިގަތުމަށް ގޮވާލައްވާފައެވެ.
"އަޅުގަނޑާއެކު ނިކުމެވަޑައިގަންނަވާ. އަޅުގަނޑުމެންގެ ގައުމަށް އަންނަމުންދާ ހެޔޮ ބަދަލުތައް ދިފާއު ކުރުމަށްޓަކައި ބައިވެރިވެއްލައްވާ." ފާތުން ވިދާޅުވިއެވެ.
ފާތުން ވިދާޅުވި ގޮތުގައި ތަރައްގީގެ އެއްވެސް މަޝްރޫއެއް ހުއްޓުމަކަށް ރައްޔިތުން ނޭދޭނެ ކަމަށާއި މިހާރު އަންނަމުންދާ ތަރައްގީ ދެމެހެއްޓޭނީ އިތުރު ދައުރަކަށް ރައީސް ޔާމީން އިންތިހާބުކުރެވިގެން ކަމަށެވެ.
މީގެ އިތުރުން ފަސްޓްލޭޑީ ފާތުން ވަނީ، ފިރިކަނލުން އަބްދުﷲ ޔާމީންގެ ފަރާތުން ދިވެހި ފިރިހެނުން މިސާލު ނެންގެވުމަށް އެދިވަޑައިގެންފައެވެ. އެކަމަނާ ވިދާޅުވި ގޮތުގައި ދިވެހި ރައްޔިތެއްގެ ހައިސިއްޔަތުން މެޑަމް ވަނީ ރައީސް ޔާމީން ރާއްޖެއަށް ކޮށްދެއްވަމުން ގެންދަވާ ކަންތައްތަކަށް ޝުކުރު އަދާ ކުރަައްވާ ކަމަށެވެ.