ދޫނިދޫ ކަސްޓޯޑިއަލްގައި ބަންދުކޮށްފައި ތިބި ސިޔާސީ ފަރާތްތަކެއް ދޫކޮށްލުމަށް ފުލުހުންގެ ތަރުޖަމާނު ސުޕްރިންޓެންޑެންޓް އޮފް ޕޮލިސް އަހްމަދު ޝިފާން އެންގެވި ކަމަށް ކުރީގެ ޑެޕިއުޓީ ކޮމިޝަނަރ ސައުދީ ވިދާޅުވެއްޖެއެވެ.
ސައުދީ މިހެން ވިދާޅުވެފައިވަނީ 1 ފެބްރުއަރީގައި ހިނގާދިޔަ ކަންތަކާއި ބެހޭގޮތުން ފުލުސް އޮފީހަށް ދެއްވާފައިވާ ބަޔާނުގައެވެ.
އެ ބަޔާނުގައި ސައުދީ ވިދާޅުވެފައިވާ ގޮތުގައި، ޝިފާން ކޮންމެވެސް މީހަކަށް ގުޅުއްވުމަށް ފަހު ދޫނިދޫގައި ތިބި ބަަޔަކު ދޫކޮށްލުމަށް އެންގެވި ކަމަށާއި އެފަދަ ވާހަކަތަކެއް ދެއްކެވި އަޑު އިވިވަޑައިގެންފައިވާ ކަމަށެވެ.
"އަޅުގަނޑު ހަނދާންވާ ގޮތުން، އަހްމަދް ޝިފާން ފޯނުން ކޮންމެވެސް މީހަކާއި ވާހަކަ ދައްކަމުން ގޮސް ދޫނިދޫ ކަސްޓޯޑިއަލްގައި ހައްޔަރުގައި ތިބި މީހުންގެ ތެރެއިން ސުޕްރީމް ކޯޓުން ނެރެފައިވާ އަމުރުގައި ދޫކޮށްލުމަށް ބަޔާންކޮށްފައިވާ މީހުންގެ ތެރޭގައި ފުލުހުންގެ ބެލުމުގެ ދަށުގައި ތިބި މީހުން ދޫކޮށްލާށޭ ބުނި އަޑު އަޅުގަނޑު އެހީމެވެ."
ސައުދީގެ ބަޔާނުގައި ޝިފާންގެ މައްޗަށް އިތުރު ތުހުމަތުތަކެއް ވެސް ވަނީ ކޮށްފައެވެ. އެގޮތުން ފެބްރުއަރީ މަހުގެ 1 ވަނަ ދުވަހު، ފުލުުހުންގެ އިދާރާއަށް އައުމަށް ޝިފާން ވައިބަރ ގްރޫޕެއްގައި ކުރި މެސެޖްތައް ވެސް ޑިލީޓް ކުރެއްވި ކަމަށް ސައުދީ ވަނީ ވިދާޅުވެފައެވެ.
"އެގްރޫޕްގައި މި ދެންނެވި ގޮތަށް އެސްޕީ އަހްމަދް ޝިފާން އަޅުގަނޑުމެން ތިން މީހުން ތިބިތަނަކުން ކަމިޝަނަރސް އޮފީހަށް އައުމަށް ބުނެ، ކޮށްފައިވާ މެސެޖް އޭނާ ވަނީ ޑިލީޓްކޮށްލާފައެވެ."