އިސްލާމީ އުއްމަތުގެ ގިނަ ބައެއްގެ ލޯބި ހޯއްދަވާފައިވާ، މަޝްހޫރު ދީނީ އިލްމުވެރިޔާ އިސްމާއީލް އިބްނު މޫސާ މެންކު(މުފްތީ މެންކް) މެއި މަހުގެ 16 ވަނަ ދުވަހު އައްޑޫ ސިޓީގައި ތަޤްރީރް ކުރައްވާ ގޮތަށް ހަމަޖެހިއްޖެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި "މުސްލިމް ޒުވާނުންނަށް މެސެޖެއް" ނަމުގައި މުފްތީ މެންކް ތަޤްރީރް ކުރައްވާ ގޮތަށް ހަމަޖެހިފައިވަނީ ހިތަދޫ ނޫރާނީ ސްކޫލްގައެވެ.
އިސްލާމިކް މިނިސްޓްރީގެ އޮފިޝަލަކު 'އައްޑޫލައިވް' އަށް މައުލޫމާތު ދެއްވަމުން ވިދާޅުވި ގޮތުގައި މުފްތީ ތަޤްރީރްކުރައްވާ ގޮތަށް މިހާރު ހަމަޖެހިފައިވަނީ ނޫރާނީ ސްކޫލްގައި ކަމަށާއި، އެކަމުގައި އައްޑޫގެ ބައެއް ޖަމިއްޔާތަކުގެ އެހީތެރިކަމާއި އެކުގައި ކަމަށެވެ.
އެގޮތުން އިސްލާމިކް މިނިސްޓްރީން ކުރިއަށް ގެންދާ މި އިވެންޓްގެ ޕާޓްނަރުންގެ ގޮތުގައި ހަރަކާތްތެރިވަނީ ނޫރުލް އިސްލާމް ޖަމިއްޔާ،ރަބީޢުލްޣުލޫބް ފައުންޑޭޝަން އަދި ޖަމިއްޔަތުލް ޢުލޫމެވެ.
"އައްޑޫގެ ޖަމިއްޔާތަކުގެ ފަރާތުން ވަރަށް ބޮޑު އެއްބާރުލުމެއް މިކަމުގައި ދަނީ ލިބެމުން. އެކަން ޝުކުރެވެރިކަމާއި އެކު ފާހަގަކުރަން." އޮފިޝަލް ވިދާޅުވިއެވެ.
އިސްލާމިކް ޔުނިވާސިޓީ އޮފް މަދީނާއިން ޝަރީއާ ލޯއިން ޑިގްރީއެއް ހާސިލްކުރައްވައިގެން ހުންނެވި ޝެއިހް މުފްތީ މެންކަކީ، ޒިމްބާބުވޭގެ މުސްލިމު އާބާދީއަށް އިސްލާމީ ތައުލީމު ފޯރުކޮށްދޭ މަޖްލީސުއް އުލަމާގެ ދަށުން ހިންގަމުން އަންނަ އިސްލާމީ އެޑިއުކޭޝަން ސެންޓަރު ނުވަތަ ދާރުލް އިލްމުގެ ޑިރެކްޓަރެވެ.