ރައީސް ޔާމީންގެ ވެރިކަން ވައްޓާލަން އުޅުނު ކަމުގެ ތުހުމަތުގައި ކުރީގެ ރައީސް މައުމޫން އަބްދުލް ގައްޔޫމްގެ ދަރިކަނބަލުން ޔުމްނާ މައުމޫންގެ މައްޗަށް ވެސް ފުލުހުން ކޮށްފިއެވެ.
ރައީސް ޔާމީނަށް ބޮޑުބޭބެ ވިދާޅުވާ ޔުމްނާގެ މައްޗަށް މި ތުހުމަތު ފުލުހުން ކޮށްފައިވާއިރު، އެ ކަމާއި ގުޅޭގޮތުން ކުރާ ތަހުގީގަށް ސުވާލުކުރުމަށް މާދަމާ އޭނާ ފުލުހަށް ހާޒިރުކުރާނެއެވެ.
މައުމޫނުގެ އާއިލާއާއި ގާތްގުޅުމެއް އޮންނަ ފަރާތަކުން 'އައްޑޫލައިވް' އަށް ކަށަވަރުކޮށްދީފައިވާ ގޮތުގައި މާދަމާ ހަވީރު ފުލުހަށް ހާޒިރުވާން ޔުމްނާއަށް މިހާރު ވަނީ ޗިޓް ވެސް ފޮނުވާފައެވެ.
ޔުމްނާ މައުމޫންގެ މައްޗަށް ވެރިކަން ވައްޓާލުމުގެ ތުހުމަތު ކުރާއިރު ފިރިކަލުން މުހައްމަދު ނަދީމުގެ މައްޗަށް ޓެރަރިޒަމްގެ ދައުވާ ވަނީ އުފުލާފައެވެ.
ނަދީމްގެ އިތުރުން ޔުމްނާގެ ބައްޕާފުޅު ރައީސް މައުމޫނާއި ކޮއްކޯފުޅު އަހުމަދު ފާރިސް މައުމޫންގެ މައްޗަށް ވެސް ޓެރަރިޒަމްގެ ދައުވާ އުފުލައި މިހާރު ވަނީ ޝަރީއަތް ވަނީ ފަށާފަ އެވެ.
ރައީސް މައުމޫނާއި ފާރިސް އަދި ނަދީމް ބަންދުކޮށްފައި ވީ ނަމަވެސް އެކަމާއި ބެހޭގޮތުން މައުމޫނުގެ ހަގު ދަރިކަލުން ޣައްސާން މިހާތަނަށް އެއްވެސް އެއްޗެއް ވިދާޅުވެފައެއް ނުވެއެވެ. އެހެން ނަމަވެސް އެ ބޭފުޅުންގެ ދިފާއުގައި ޔުމްނާ ގެންދަވަނީ ވަރަށް ބޮޑަށް މަސައްކަތް ކުރައްވަމުންނެވެ.