އިދިކޮޅު ސިޔާސީ ފަރާތްތަކުން އަބަދުވެސް ބުނަމުން ގެންދާ ގޮތުގައި ސަރުކާރުންނާއި މުއައްސަސާތަކުން ކަންތައް ކުރާގޮތުން މުޅިން ވެސް ފެންނަނީ ޖެއްސުން ކުރުމުގެ އުސޫލެވެ. ވަކިން ޚާއްސަގޮތެއްގައި ބަންދުގައި ތިބޭ ސިޔާސީ ފަރާތްތަކާއި މެދު އަމަލުކުރާ ގޮތަށް ރިޢާޔަތް ކުރުމަށްފަހުގައެވެ.
ލޮލުގެ ސްޕެޝަލިސްޓަކަށް ދެއްކުމަށް ޑޮކްޓަރު ލަފާދީފައި ވަނިކޮށް، މާލެ ގެނެސް ހަމުގެ ޑޮކްޓަރަކަށް ދައްކަފާނެއެވެ. ރައްޔިތުންގެ މަޖިލީހުގެ މެންބަރަކު މަޖިލީހުގެ ލެޓަރހެޑްގައި ސިޓީއެއް ފޮނުވައިފި ނަމަ އެ ސިޓީ ބަދަލުކުރަން އަންގަފާނެއެވެ. ރާއްޖެއިން ބޭރަށް އިތުރުފަރުވާއަށް ފޮނުވަން ޑޮކްޓަރު ލަފާދިނުމުން އެކަމާއި ދެކޮޅު ހެދުމުގެ ގޮތުން ކޯޓަށް މައްސަލަ ހުށަހަޅާފާނެއެވެ.
މިފަހަރުވެސް ދިމާވެގެން މިއުޅެނީ އެފަދަ ކަމެކެވެ. ރާއްޖޭގެ ރައްޔިތުންގެ ތެރެއިން އެތައް ބަޔަކު "30 އަހަރުގެ ބާނީ"ގެ ގޮތުގައި ސިފަކުރައްވާ ރައީސް މައުމޫނު ދޫނިދޫ ޖަލުގައި ބަންދުކޮށްފައި ހުއްޓައި އެމަނިކުފާނަށް ވަނީ ސިއްޙީ މައްސަލަތަކެއް ކުރިމަތިވެފައެވެ. ޑޮކްޓަރުން ލަފާދެއްވާފައި ވަނީ މައުމޫނު އާއިލާ އާއި އެކުގައި ބެހެއްޓުމަށެވެ. އަދި އެމަނިކުފާނަށް ދިމާވެފައިވާ ސިއްޙީ ހާލުކޮޅު ނާޒުކު ކަމުން، އެކަނި ނުބަހައްޓަން ވެސް ޑޮކްޓަރުން ލަފާދެއްވިއެވެ.
މައުމޫނުގެ ދަރިކަނބަލުން ޔުމްނާ ވިދާޅުވެފައިވާ ގޮތުގައި އެމަނިކުފާނަށް ކުރިމަތިވެވަޑައިގެންފައިވާ މައްސަލައަކީ ބެނިން ޕްރޮކްސިމަލް ޕޮޒިޝަނަލް ވާޓީގޯ(ބީޕީޕީވީ) ނަމަކަށް ކިޔާ ހާލަތެކެވެ. އެ ހާލަތު މެދުވެރިވަނީ އުމުރުން ދުވަސްވުމުގެ ސަބަބުންނާއި ބޮލަށް ލިބޭ ގެއްލުމެއްގެ ސަބަބުންނެވެ. ބީޕީޕީވީއަކީ ކަންފަތުގެ އެތެރެއަށް ދިމާވާ މައްސަލައެއްގެ ސަބަބުން ކުރިމަތިވާ ހާލަތެކެވެ.
އެ ހާލަތު ކުރިމަތިވުމުން ބޮލަށް ގެންނަ ހަރަކާތެއްގެ ސަބަބުން ބެލެންސުން ނެއްޓި މީހާ ވެއްޓޭ ގޮތް މެދުވެރިވެދާނެއެވެ. އަދި އެ ހާލަތު ކުރިމަތިވާ މީހާއަށް އޭނާގެ ވަށައިގެން ހުންނަ އެއްޗެހި އެބުރޭހެން ހީވެދާނެއެވެ. އޭގެއިތުރުން ސްޓްރޯކް ޖެހުން ފަދަ ނުރައްކާތެރި ސިއްހީ މައްސަލަތައް ކުރިމަތިވެދާނެއެވެ.
އުމުރުފުޅުން 80 އަހަރުގެ ރައީސް މައުމޫންގެ ސިއްޙީ ހާލުކޮޅު ގޯސްވެގެން އެކަމާއި އާއިލާއިން ކަންބޮޑުވުން ފާޅުކުރާތާ މިއަދަށް 5 ދުވަސްވެގެން ދާއިރު ސަރުކާރުން މިވަނީ އެކަމަށް އިޖާބަދީފައެވެ. އެހެން ނަމަވެސް އިދިކޮޅު ފަރާތްތަކުން ކުރިންވެސް ބުނަމުން ގެންދާފަދައިން، "ޖެއްސުން ކުރުމުގެ އުސޫލުން" ނެވެ.
މިއަދު ހަވީރު މައުމޫނުގެ ދަރިކަނބަލުން ދުންޔާ މައުމޫން ފުލުސް އޮފީހަށް ހާޒިރުކުރާނެއެވެ. ސޯޝަލް މީޑިޔާގައި އަޑުފެތުރިފައިވާ ގޮތުން ދުންޔާ ވެސް މިއަދު ފުލުހުންގެ ބެލުމުގެ ދަށަށް ގެންދާނެއެވެ. މިއީ ހަގީގަތެއް އެކުލެވޭ ވާހަކައެއް ކަމުގައި ނުވިޔަސް، މައުމޫނުގެ ސިއްޙީ ހާލުކޮޅު ގޯސްވެފައި ވަނިކޮށް ކުއްލިއަކަށް ޔުމްނާ ފުލުހަށް ހާޒިރު ކުރާތީ އެތައް ބަޔަކު ދަނީ ފާޑު ކިޔަމުންނެވެ.
މައުމޫން އަބްދުއްޤައްޔޫމްގެ ސިއްހީ ހާލުކޮޅު ގޯސްވެ، އާއިލާއާއިއެކު ހުންނެވުމަށް ޑޮކްޓަރުން ލަފާދެއްވުމުން އޭގެ މާނައަކީ މުޅި އާއިލާ ހައްޔަރުކުރުން ނޫންކަމަށް އެމަނިކުފާނުގެ ޤާނޫނީ ވަކީލް މައުމޫން ޙަމީދު ވެސް ވަނީ ވިދާޅުވެފައެވެ.
ޔުމްނާ ހައްޔަރުކޮށްފި ނަމަ، ރައީސް މައުމޫންގެ އާއިލާ ބޭފުޅުންގެ ތެރެއިން ރައީސް އަބްދުﷲ ޔާމީންގެ ސަރުކަރުގެ ނުރަނގަޅު ވާހަކަތައް ދައްކަވާ ބޭފުޅުންގެ ތެރެއިން ބާކީ ހުންނަވާނީ ރައީސް މައުމޫންގެ އަނބިކަނބަލުން ނަސްރީނާ އެކަންޏެވެ.
ދުންޔާ މައުމޫން އާއި ޤައްސާނު މައުމޫން ޔާމީނާއި ދެކޮޅަށް ފާޅުގައި ވާހަކަފުޅެއް ނުދައްކަވައެވެ. އެހެންވެ ފަހަރުގައި އަދި އެދެބޭފުޅުން "ސަރުކާރު ވައްޓާލަން" އުޅުނު ކަމުގެ ތުހުމަތުން ބަރީއަވެދާނެއެވެ.
ކޮންމެއަކަސް މިއަދު އަނެއްްކާވެސް މިފެންނަނީ އިދިކޮޅުން ބުނާ ގޮތަށް ޖެއްސުން ކުރުމުގެ އާ ސަފްހާއެކެވެ.