ކެންދޫ ދާއިރާގެ މަޖިލިސް މެންބަރު އަލީ ޙުސައިން، ކްރިމިނަލް ކޯޓަށް ހާޒިރުވުމަށް ޗިޓު ފޮނުވައިފިއެވެ.
އަލީ ހުސައިން ކްރިމިނަލް ކޯޓަށް ހާޒިރުވުމަށް އަންގާފައި ވަނީ މިމަހުގެ 13 ވަނަ ދުވަހުގެ 10:00 އަށެވެ. އެއީ އޭނާގެ މައްޗަށް ދައުލަތުން އުފުލާފައިވާ ޤާނޫނު ތަންފީޒު ކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ކުށުގެ ދައުވާގެ އިބްތިދާއީ އަޑުއެހެމަށެވެ.
އަލީ ހުސައިންގެ މައްޗަށް އުފުލާފައިވާ ދައުވާ ސާބިތުވެއްޖެ ނަމަ އޭނާގެ މައްޗަށް 4 މަހާއި 24 ދުވަހުގެ ޖަލު ހުކުމެއް އަންނާނެ އެވެ. އެހެން ނަމަވެސް އެއީ މަޖިލީހުގެ މެމްބަރުކަމުގެ ގޮނޑި ގެއްލޭ ވަރުގެ ހުކުމެއް ނޫނެވެ.
"ގަަދަކަމުން މަޖިލީހަށް ވަން" ކަމަށް ފުލުހުން ބުނާ މައްސަލާގައި، ގާނޫނު ތަންފީޒުކުރާ މުވައްޒަފަކަށް ހުރަސް އެޅުމުގެ ދައުވާ އަލީ ހުސައިނާ އެކު 12 މެމްބަރެއްގެ މައްޗަށް ކުރެ އެވެ.