އެއްވެސް މީހެއްގެ ނުފޫޒުގައި ޝަރުޢީ ކޯޓެއްގެ ފަނޑިޔާރަކު ހުކުމް ނެރެފައިވާނަމަ އެއީ ޖިނާއީ ކުށެއް ކަމުގައި ކްރިމިނަލް ކޯޓުގެ ގާޒީ ހުސައިން ޝަހީދު ވިދާޅުވެއްޖެއެވެ.
ގާޒީ ޝަހީދު މިހެން ވިދާޅުވެފައި ވަނީ އުއްތަމަ ފަނޑިޔާރު އަބްދުﷲ ސައީދު އާއި ފަނޑިޔާރު އަލީ ހަމީދުގެ މައްޗަށް ހުކުމް އިއްވުމުގެ ކުރިން، އެބޭފުޅުންގެ ޝަރީޢަތުގައި ފާހަގަ ކުރެވުނު ކަންތަކާއި ބެހޭގޮތުން ވާހަކަ ދައްކަވަމުންނެވެ.
އެގޮތުން ފަނޑިޔާރުން ނެރޭ ހުކުމްތަކަކީ އެއްވެސް ނުފޫޒެއް ނެތި ނެރެންޖެހޭ ހުކުމްތަކެއް ކަމަށް އިސްލާމީ ޝަރީއަތާއި ގާނޫނު އަސާސީގައި ވެސް ބަޔާންކޮށްފައިވާ ކަމަށް ޝަހީދު ވަނީ ވިދާޅުވެފައެވެ. އަދި އެއީ ފަނޑިޔާރެއްގެ ކިބައިގައި ކޮންމެހެން ވެސް ހުންނަންޖެހޭ ލާޒިމް ސުލޫކީ މިންގަނޑެއް ކަމަށް އޭނާ ވިދާޅުވިއެވެ.
"އެއްވެސް މީހެއްގެ ނުފޫޒުގައި ފަނޑިޔާރަކު ހުކުމް ނެރެފައިވާނަމަ އެއީ ޖިނާއީ ކުށެއް ކަމަށާއި އެކަމުގެ ޒިންމާ އެމީހަކު ނަގަންޖެހޭނެ ކަމަށް، އައްޑޫ ސިޓީ ހިތަދޫއަށް ނިސްބަތްވެ ވަޑައިގަންނަވާ ގާޒީ ޝަހީދު ވިދާޅުވިއެވެ.
ގާޒީ ޝަހީދު ނެރުއްވާފައިވާ ކޯޓު އަމުރެއް ވެސް ވަނީ އުއްތަމަ ފަނޑިޔާރާއި އަލީ ހަމީދުގެ މައްސަލައިގައި ހެއްކެއްގެ ގޮތުގައި ހުށަހަޅާފައެވެ. އެކަމާއި ގުޅިގެން ދިފާއީ ވަކީލުން ވަނީ އެ އަމުރު ހެއްކެއްގެ ގޮތުގައި ހުށަހަޅާފައިވާއިރު މައްސަލަ ބައްލަވަން ގާޒީ ޝަހީދު އިންނެވުމަކީ މަސްލަހަތު ފުށު އަރާ ކަމަށް އެ މައްސަލައިން ތަނާޒަލްވުމަށް އެދި ނުކުތާއެއް ފާހަގަކޮށްފައެވެ.
އެހެން ނަމަވެސް ގާޒީ ޝަހީދު ވިދާޅުވީ، އެ އަމުރަކީ ނުފޫޒު ފޯރުވިކަން ސާބިތުކުރުމަށް ހުށަހަޅާފައިވާ އަމުރެއް ނޫން ކަމަށެވެ. އަދި އެއީ ހެކިވެރިޔާ ދެއްވާފައިވާ ބަޔާނުގައި ވަނީ ތެދު ހަގީގަތްކަން އިތުރަށް ޔަގީންކުރުމަށް ދައުލަތުން ހުށަހެޅި ލިޔެކިޔުމެއް ކަމަށެވެ. އަދި މައްސަލަ ބައްލަވާ ގާޒީއަކީ މައްސަލައިގެ ވިކްޓިމް އެއް ނޫންކަމަށް ވިދާޅުވެ މައްސަލައިން ތަނާޒަލްވާން ނުޖެހޭނެ ކަމަށް ގާޒީ ޝަހީދު ވަނީ ވިދާޅުވެފައެވެ.