މިއަހަރުގެ ރިޔާސީ އިންތީޚާބުގައި އެމްޑީޕީގެ ރިޔާސީ ކެނޑިޑޭޓަކަށް ވެވަޑައިގަތުމަށް ރައީސް ނަޝީދު ކުރައްވާ ކެމްޕެއިން، "ޖަޒީރާ ރައީސް" އައްޑޫ ސިޓީގައި ލޯންޗްކޮށްފިއެވެ.
"ޖަޒީރާ ރައީސް" ކެމްޕެއިން ލޯންޗް ކޮށްފައިވަނީ އައްޑޫ ސިޓީ، ހިތަދޫ އެމްޑީޕީ ހަރުގޭގައި ބޭއްވި ޚާއްސަ ޖަލްސާއެއްގައެވެ.
މިޖަލްސާގައި އައްޑޫ ސިޓީ ކައުންސިލްގެ މެންބަރުންނާއި ބައެއް މަޖިލިސް މެންބަރުންނާއި އަދި މާލޭ ސިޓީ ކައުންސިލްގެ މެންބަރުން ވެސް ވަނީ ބައިވެރިވެވަޑައިގެންފައެވެ. ކުރީގެ ރައީސް މުހައްމަދު ނަޝީދު ވަނީ މި ޖަލްސާގައި ވީޑިއޯ މެސެޖެއް ދެއްވާފައެވެ.
ނަޝީދު ވިދާޅުވި ގޮތުގައި ޤައުމީ އެއްބައިވަންތަކަމުގެ ސަރުކާރެއް އުފައްދާ ޤައުމަށް ބޭނުންވާ ބަދަލުތައް ގެންނެވާނެ ކަމަށެވެ. އަދި އެސަރުކާރުގެ މުއްދަތަކީ ހަ އަހަރު ކަމަށާއި އަދުލު އިންސާފް ޤާއިމްކޮށް ސަލާމަތީ ޚިދުމަތްތައް ރަނގަޅު ކުރެއްވުމަށް އިސްކަން ދެއްވާނެ ކަމަށެވެ.
މީގެ އިތުރުން ނަޝީދު ވަނީ، ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކުރަންޖެހޭކަން ފާހަގަކުރައްވާފައެވެ. އެމަނިކުފާނު ވަނީ އެކަމަށް ރައްޔިތުންގެ ތާއީދު ކުރުމަށް އެދިވަޑައިގެންފަ އެވެ.