އެމްޑީޕީން ކުރިއަށް ގެންދާ "ދޭތިން ފަހެތި" ކެންޕޭން ޕްރޮގްރާމްގެ ދަށުން ސ. ހިތަދޫ އުތުރު ދާއިރާ އާއި ހިތަދޫ މެދު ދާއިރާ އަދި ހިތަދޫ ދެކުނު ސަރަޙައްދަށް ޚާއްޞަ ކޮށްގެން ބާއްވާ މަސައްކަތު ބައްދަލުވުމެއް މި ހަފުތާ ބަންދުގައ ކުރިއަށް ދާނެ ކަމަށް އެ ޕާޓީން ބުނެފި އެވެ.
އެމްޑީޕީ އައްޑޫ ދާއިރާ އިން ބުނީ އަދި ހޮނހިިރު ދުވަހު ފޭދޫ، މަރަދޫ ފޭދޫ، އަދި ހުޅުމީދޫ ދާއިރާ އަށް ޚާއްޞަކޮށްގެން ކުރިއަށް ދާނެ ކަމަށެވވެ.
އައްޑޫ ސިޓީގެ އެމްޑީޕީ އޮފީހުން މައުލޫމާތު ދިން ގޮތުގައި މި މަސައްކަތު ބައްދަލުވުމުގެ ބޭނުމަކީ އައްޑޫ ސިޓީގައި މިހާރު ކުރިއަށް ދާ "ދޭތިން ފަހެތި" ކެންޕޭން އިތުރަށް ވަރުގަދަކޮށް އެމްޑީޕީގެ ކެންޕެއިން އާއި ބެހޭ ގޮތުން އިތުރަށް މައުލޫމާތު ހިއްސާ ކުރުމެވެ.
އައްޑޫ ސިޓީގެ އެމްޑީޕީ ބުނި ގޮތުގައި އައްޑޫ ސިޓީގެ ހުރިހާ ރަށްތަކެއްގައި ވެސް އެމްޑީޕީ "ދޭތިން ފަހެތި" ކެމްޕޭން މަސައްކަތް މިހާރު ވެސް ފޯރިއާ އެކު ކުރިއަށްދާ ކަމަށާއި، ދޭތިން ފަހެތި ކެންޕެއިން އޮނިގަނޑުގެ ބޮޑުބައެއް އެކުލަވައިލާ ނިމުމާއި ދޮރުން ދޮރަށް ހިނގުމުގެ ދެވަނަ ބުރުގެ ބޮޑު ބައެއް މިހާރުވެސް ނިމިފައިވާ ކަމަށެވެ.
އަދި ހައުސް އެޖެންޓުން ކަނޑަ އެޅުމާއި ބްލޮކް އޭޖެންޓް ކަނޑައެޅުމުގެ މަސައްކަތް ނިމިފައިވާ ކަމަށާއި ގޭބިސީ އެޖެންޓުންގެ ބައްދަލުވުންތަކާއި ކަންމަތީ ބައްދަލުވުންތައް ވެސް މިހާރު ފެށިފައިވާ ކަމަށް ބުންޏެވެ.
މީގެ އިތުރުން ޑާޓާ އެންޓަރިން އަށް ކުދިންނަށް ތަމްރީނު ދިނުމާއި އެކަމަށް ބޭނުންވާ ވަޞީލަތްތައް ޤާއިމް ކުރުމުގެ މަސައްކަތް ކުރިއަށްދާ ކަމަށް ވެސް އެމްޑީޕީ އައްޑޫ ސިޓީ އޮފީހުން ބުންޏެވެ.