ކުރީގެ ކޮމިޝަނަރު އޮފް ޕޮލިސް އަހުމަދު އަރީފް ގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާ އުފުލާފައިވަނީ ޝަރުޢީ ކޯޓެއްގެ ހުކުމް ތަންފީޒް ކުރަން އުޅުއްވުމުން ކަމަށް އޭނާ ވިދާޅުވެއްޖެއެވެ.
އިއްޔެ ކްރިމިނަލް ކޯޓުގައި ކުރިއަށް ދިޔަ ޝަރީޢަތުގެ އަޑުއެހުމުގައި އަރީފް ވަނީ އޭނާގެ މައްޗަށް އުފުލި ޓެރަރިޒަމްގެ ދައުވާއަށް އިންކާރު ކުރައްވާފައެވެ.
"އަޅުގަނޑުގެ މައްޗަށް ޓެރިރިޒަމްގެ ދައުވާ އުފުލާފައިވަނީ ޝަރުއީ ކޯޓެއްގެ ހުކުމް ތަންފީޒުރަން އުޅުމުން،" އަރީފް ވިދާޅުވިއެވެ.
އަރީފުގެ މައްޗަށް ކުރާ ދައުވާ އިއްވަމުން ދައުލަތުގެ ވަކީލް ވިދާޅުވީ، ޕޮލިސްް ކޮމިޝަނަރު އަކަށް ހުންނަވައި މަގާމުގެ ނުފޫޒު ބޭނުންކުރައްވައިގެން ދުރާލާ ރާވައިގެން ފުލުހުންގެ އޮޕަރޭޝަން ސިސްޓަމަށް ބަދަލު ގެނެސް ގާނޫނީ ގޮތުން އުފެދިފައިވާ ސަރުކާރެއް ވައްޓާލަން އަރީފު އުޅުއްވި ކަމަށެވެ. އެކަން ސާބިތުކުރުމަށް ދައުލަތުގެ ފަރާތުން ވަނީ އިންޓެލިޖެންސް ރިޕޯޓެއް ހިމެނޭގޮތަށް 31 ހެއްކެއް ހުށަހަޅާފައެވެ.
އިއްޔެގެ އަޑުއެހުން ގާޒީ ނިންމާލާފައި ވަނީ، އަރީފްގެ މައްސަލަ އަކީ އަކީ މަދަނީ މިންގަނޑުން ކުރިއަށްގެންދެވޭނެ މައްސަލައެއް ކަމަށް ކަނޑައަޅުއްވުމަށް ފަހުއެވެ. މި މައްސަލައިގެ އަޑުއެހުމެއް ދެން އޮންނާނީ މެއި މަހުގެ 20 ވަނަ ދުވަހުއެވެ.