ފޮޓޯއިން ތިޔަ ފެނިވަޑައިގެންނަވަނީ ހިތަދޫ މެދު އާރިމަގާއި ބޮޑުމަގު ގުޅޭ ހިސާބުގައި ކޭބަލެއް ވަޅުލުމަށްޓަކައި ތާރުގަނޑު ކަނޑާފައިވާ ސަރަހައްދެކެވެ. ކޭބަލް ވަޅުލުމުގެ މަސައްކަތް ނިމިފައި ވާއިރު، އެތަން ހުރި ގޮތުން މަގުން ދަތުރުކުރާ މީހަކަށް އަނިޔާއެއް ލިބުމުގެ ފުރުސަތު ބޮޑެވެ.
ގާތްގަނޑަކަށް 20 ފޫޓު ދިގަށް ތާރުގަނޑު ކަނޑާލާފައި ވާއިރު، އެތަނުގެ ބައެއް ދިމާތަކުގެ ފުން މިނުގައި ދޮޅު ފޫޓު ހުރިކަން ފާހަގަކުރެވެއެވެ.
ކޭބަލް ވަޅުލުމަށްޓަކައި ކޮންމެ ބަޔަކު މިތަން ކަނޑައި ނެގި ނަމަވެސް އެކަމެއް ކުރާނީ ކަމާއި ބެހޭ ފަރާތުގެ ހުއްދަ އާއި އެކުއެވެ. މިހާރުގެ އުސޫލުން ނަމަ އެ ހުއްދަ ދޭނީ ހައުސިން މިނިސްޓްރީންނެވެ. ހުއްދަ ދިނަސް ދޭނީ ވަކި ކަންކަން ކުރުމަށް ލާޒިމްކޮށްފައެވެ. އެގޮތުން އެތަނަކީ ކޮނެފައި ހުރިތަނެއްކަން އެނގޭނެ ނިޝާންތަކެއް ހުންނަން ޖެހޭނެއެވެ. އަނެއްކޮޅުން ވާރޭ ވެހި ފެންހެދިފައި ހުރުމުން އެތަނުގެ ފުން މިނެއް އެނގޭނެ ގޮތެއް ނޯންނާނެއެވެ. އެހެންވެ މީހެއްގެ ފުރާނައަށް ގެއްލުން ވުމަކީ އެކަށީގެންވާކަމެކެވެ.
މާޒީއަށް ބަލާއިރު މިގޮތަށް ހިތަދޫން މަރަދޫއަށް އަރާ ހިސާބުގައި ކޮނެފައި ހުރި ވަޅުގަނޑަކަށް ވެއްޓި ޒުވާނެއްގެ ބޯފަޅައިގެން ގޮސް ވަނީ ނިޔާވެފައެވެ. އެކަން ތަހުގީގު ކުރިއެވެ. ވީ ނުވީއެއް ނޭގެއެވެ. އެކަން ތަހްގީގުކޮށް ފިޔަވަޅެއް އަޅަން އެއްވެސް ނިންމުމެއް ނިންމި ނަމަ މިފަދަ ވަޅުގަނޑުތައް މަގުތަކުގައި ހަދާފައި ނުހުންނާނެއެވެ.
ކޮންމެ ބަޔަކު ކުރިއަސް މިކަން ބަލައި މިކަންކަން އިސްލާހު ކުރުވައި އެފަދައިން ކަންކުރާ ފަރާތްތައް ޖަވާބު ދާރީ ކުރުވުވަކީ ދައުލަތުގެ ޒިއްމާއެކެވެ. މުޖްތަމައުގެ ތެރެއިން ފެންނަ މިފަދަ ކަންކަން އަޅުގަނޑުމެންނާއި ވީހާވެސް ގިނައިން ހިއްސާ ކޮށްދެއްވާށެވެ. އެ މަންޒަރުތަކާއި އަޑު "އައްޑޫލައިވް"އިން ގެނެސްދޭނަމެވެ.