އައްޑޫ ސިޓީ ހިތަދޫގައި ތާރުއަޅައިގެން ހަދާފައިވާ މަގުތަކުގައި ކޭބަލް ވަޅުލުމަށް ތާރުގަނޑު ކަނޑާފައިވާ ދިމާތަކަށް ހައުސިން މިނިސްޓްރީގެ މުވައްޒަފުން ނިކުމެ މިއަދު ވެލިއަޅައިފިއެވެ.
ހައުސިން މިނިސްޓްރީން މިއަދު ނިކުމެ އެ ސަރަހައްދުތަކަށް ވެލި އަޅާފައި މިވަނީ އެކަމާއި މެދު ގިނަ ބައެއްގެ ނުރުހުން އަމާޒުވެފައި ވަނިކޮށެވެ.
ހިތަދޫގެ ބައެއް މަގުތަކުގައި ގާތްގަނޑަކަށް 20 ފޫޓު ދިގަށް ތާރުގަނޑު ކަނޑާލާފައި ވާއިރު، އެތަނުގެ ބައެއް ދިމާތަކުގެ ފުން މިނުގައި ދޮޅު ފޫޓު ހުއްޓެވެ. އޭގެ ސަބަބުން މަގުން ދަތުރުކުރާ މީހުންނަށް އަނިޔާ ވެދާނެ ކަމަށް ބުނެ ގިނަ ބަޔަކު ވަނީ ސޯޝަލް މީޑިޔާގައި ވެސް ހައުސިން އަށް ފާޑުކިޔާފައެވެ.
ތާރުގަނޑު ކަނޑާލާފައިވާ ދިމާތަކަށް މިއަދު ވެލި އެޅި ނަމަވެސް، ކުރިއަށް އޮތް 2 ދުވަހެއްގެ ތެރޭގައި ތާރު އަޅާނެ ކަމަށް ހައުސިން މިނިސްޓްރީގެ އޮފިޝަލަކު ވަނީ ބުނެފައެވެ. އޮފިޝަލް ބުނި ގޮތުގައި ތާރުގަނޑު ކަނޑާލި ތަންތަން މަރާމާތު ކުރުން ލަސްވީ "ކޮމިއުނިކޭޝަން އެރާ" އަކުން ކަމަށެވެ.