އައްޑޫ ސިޓީ ލިންކް ރޯޑްގެ އެކި ހިސާބުތަކުގައި ބޮޑެތި ވަޅުގަނޑުތައް ހެދިފައިވުމުގެ ސަބަބުން އެ މަގުން ދަތުރުކުރާ ފަރާތްތަކަށް ބޮޑެތި ދަތިތަކާއި ކުރިމަތިވަމުން އެބަދެއެވެ.
ސ.ހިތަދޫން ފެށިގެން ގަމާއި ހަމައަށް ހަދާފައިވާ ލިންކް ރޯޑު މަރާމާތު ކުރުމުގެ މަސައްކަތް ހުއްޓުނީ، މޯލްޑިވްސް ރޯޑް ޑިވޮލަޕްމަންޓް ކޯޕަރޭޝަން(އެމްއާރްޑީސީ) އުވާލައި އެ ކުންފުނީގެ މަސައްކަތްތައް ހައުސިން މިނިސްޓްރީގެ ދަށަށް ބަދަލުކުރަން ނިންމި ހިސާބުންނެވެ.
ލިންކް ރޯޑުން އެންމެ ބޮޑަށް ވަޅުގަނޑު ހެދިފައިވަނީ، މަރަދޫ 'އެންޒޯ' ފިހާރަ އާއި ބީއެމްލް މަރަދޫފޭދޫ ބްރާންޗާއި ދެމެދުގައެވެ. އެހިސާބުގައި ހުރި ބައެއް ވަޅުގަނޑުތަކުގައި ދޮޅު ފޫޓު ހުރި އިރު މަގުން ދުއްވާ ފަރާތްތަކަށް ވަނީ އަނިޔާތަކެއް ވެސް ލިބިފައެވެ.
ހިތަދޫ ޕޮލިސް ސްޓޭޝަނުން ކުރިމަތީގައި ހެދިފައިވާ ވަޅުގަނޑުތައް މަރާމާތު ނުކުރެވި ގިނަ ދުވަސްތަކެއް ވުމުގެ ސަބަބުން އެދިމާލުގައި އަޅާފައިވާ ތާރުގަނޑު ކަނޑައިގެން ގޮސްފައެވެ. އަދި މީގެ އިތުރުން ހިތަދޫ ބެންކާއި އަދި އެޕޯލޯ ސްޓޯރާއި ދިމާލުގައި ވެސް ދޮޅު ފޫޓުގެ ވަޅުގަނޑުތައް އެބަހުއްޓެވެ.
އައްޑޫގައި ހުރި އެމްއާރްޑީސީ ސައިޓުގެ ނަންބޯޑު ވެސް ނަގާލުމަށް ފަހު ހައުސިން މިނިސްޓްރީގެ ޕަބްލިކް ވޯކްސްގެ ނަން ބޯޑެއް ހަރުކޮށްފައިވާއިރު އައްޑޫގައި ހުރި އެމްއާރްޑީސީގެ ހުރިހާ ވެހިކަލަކާއި މުވައްޒަފުން ވެސް ތިބީ ހައުސިން މިނިސްޓްރީގެ ބެލުމުގެ ދަށުގައެވެ. އެހެން ނަމަވެސް ލިންކް ރޯޑު މަރާމާތު ކުރުމުގެ އެއްވެސް މަސައްކަތެއް ކުރިއަށް ގެންދާ ތަނެއް ނުފެނެއެވެ.
މީގެ ކުރިން ލިންކް ރޯޑު މަރާމާރު ނުކޮށްގެން ޝަކުވާކުރުމުން ހައުސިން މިނިސްޓްރީގެ އައްޑޫ ޑިޕާޓްމަންޓުގެ ވެރިން ވިދާޅުވާ ގޮތުގައި އެކަން ނުކުރެވެނީ އެމްއާރްޑީސީން "އެއްބާރުލުން ނުދީގެން" ކަމަށެވެ.