އައްޑޫ ސިޓީ ލިންކްރޯޑުގެ އެކި ހިސާބުތަކުގައި ބޮޑެތި ވަޅުގަނޑުތައް ހުރުމުގެ ސަބަބުން އެމަގުން ދަތުރުކުރާ މީހުންނަށް ބޮޑެތި ގެއްލުންތަކެއް ލިބެމުންދާތީ، އެ ވަޅުގަނޑުތައް ހުރި ސަރަހައްދުތައް އެނގޭނެ ގޮތް ހެދުމުގެ މަސައްކަތް އާއްމު ރައްޔިތުން ފަށައިފިއެވެ.
ސ.ފޭދޫ އިން ފެށިގެން ހިތަދޫ އާއި ހަމައަށް ހަދާފައިވާ ލިންކްރޯޑުގެ އެކި ހިސާބުތަކުގައި ގިނަ އަދަދެއްގެ ވަޅުގަނޑުތައް ހެދިފައިވާއިރު ބައެއް ވަޅުގަނޑުތަކުގެ ފުން މިނުގައި ދޮޅު ފޫޓު އެބަހުއްޓެވެ.
ހިތަދޫ ބަޔަކު ނިކުމެ ވަނީ އެރަށު ސުވަދީވް ކެފޭ އާއި ދިމާލަށް ހުރި ބޮޑު ވަޅުގަނޑެއް ފާހަގަކުރުމަށް ގަހެއްގެ ގޮފިގަނޑަކާއި ބެނާއެއް ވެސް ހަރުކޮށްފައެވެ. އެ ވަޅުގަނޑު ފާހަގަކުރުމަށް ޖަހާފައި ހުރި ބެނާއަކީ ޕީޕީޢެމް އިން އައްޑޫގައި ބޭނުންކުރި ބެނާއެކެވެ.
"މަގެ ދީނާ މަގެ ޤައުމާ ނުކުޅެއްޗޭ" ލިޔެފައިވާ އެ ބެނާ ހަރުކުރީ ޕީޕީއެމް ސަޕޯޓަރުން ކަމެއް ނުވަތަ އެހެން ބަޔަކު ކަމެއް އަދި ނޭނގެއެވެ.
އިއްޔެއިން ފެށިގެން ހިތަދޫއަށް ވިއްސާރަކުރަމުންދާއިރު، ލިންކްރޯޑުގައި ފެންބޮޑުވެއްޖެ ނަމަ މަގުން ދަތުރުކުރާ މީހުންނަށް އެވަޅުގަނޑުތައް ނުފެންނާނެއެވެ. އެގޮތަށް ހުރި ވަޅުގަނޑުތަކަށް ވެއްޓި ގިނަ ބަޔަކަށް މީގެ ކުރިން ވެސް ވަނީ އަނިޔާވެފައެވެ.
ލިންކްރޯޑުގައި ވަޅުގަނޑުތައް ހެދިފައިވާއިރު ލިންކްރޯޑު މަރާމާތު ކުރުމަށް ހައުސިން މިނިސްޓްރީން އެކަށީގެންވާ މަސައްކަތެއް ކުރަމުން ނުދާކަން ފާހަގަކުރެވެއެވެ.