އައްޑޫ ސިޓީ ފޭދޫގެ ރައްޔިތުން ގެންދަނީ ޒަމާނުއްސުރެ ބިމުގެ ދަތިކަން ތަޙައްމަލް ކުރަމުންނެވެ. އެ މައްސަލައަށް ޙައްލެއް ލިބޭނެ ކަމުގެ އުއްމީދު އާވެގެން ދިޔައީ، 2016 ވަނަ އަހަރުގެ މެއި މަހުގެ ތެރޭގައި އެރަށުގެ ބިން ހިއްކުމުގެ މަޝްރޫޢިންނެވެ. ނެދަލޭންޑްސްގެ ކުންފުންޏެއް ކަމަށްވާ، ވަން އޫޑް ކުންފުނިން ހިންގި އެ މަޝްރޫއުގެ ދަށުން 50 ހެކްޓަރުގެ ބިން ހިއްކިއެވެ.
ފޭދޫން ހިއްކި ބިމާއި މެދު އެރަށުގެ ރައްޔިތުން ދަނީ ފޮނި ހުވަފެންތަކެއް ބަލަމުންނެވެ. ގޯތި ދޫކުރާނެ ކަމުގެ އުއްމީދާއި އެ ބިމުގައި ތަރައްޤީގެ ބިޔަ މަޝްރޫޢުތައް ހިންގާ ތަން ބަލަން އެރަށުގެ ރައްޔިތުން ތިބީ ކެތް މަދުވެފައެވެ.
އެ އުއްމީދުތައް އިތުރަށް އާކޮށްދެއްވީ ރައީސް ޔާމީނެވެ. 2017 ވަނަ އަހަރުގެ ރިޔާސީ ބަޔާން އިއްވަމުން އެމަނިކުފާނު ވަނީ ފޭދޫ ހިއްކި ބިމުގައި 100 ހައުސިން ޔުނިޓް އަޅުއްވާނެ ކަމުގެ ޔަގީންކަން ދެއްވާފައެވެ.
ރައީސް ޔާމީންގެ މިވާހަކަފުޅަށް މާގިނަ ދުވަހެއް ނުވެ، ފޭދޫން ހިއްކި ފަންސާސް ހެކްޓަރ ބިމުގެ ލޭންޑް ޔޫސް ޕްލޭން ނިމިފައިވާ ކަމަށް ހައުސިން މިނިސްޓްރީން ހާމަކުރިއެވެ. އެ ޕްލޭނެއް ހާމަކުރިތާ މާގިނަ ދުވަހެއް ނުވެ ފޭދޫ ހިއްކި ބިމުގައި ގެސްޓް ހައުސްގެ ބިޔަ މަޝްރޫޢެއް ފަށާނެކަން ވެސް އިއުލާންކުރިއެވެ.
ސަރުކާރުން ފޭދޫ ރައްޔިތުންނަށް ދެއްކި މި ފޮނި ހުވަފެންތަކާއި "ސަޅިބައިސާ" ތަކަށް އެތައް ދުވަހެއް ވެގެންދާއިރު، ފޭދޫ ހިއްކި ބިމުން ފެންނަ ހަމައެކަނި ތަރައްޤީ އަކީ ހަލުވިކަމާއި އެކު ހެދެމުން އަންނަ ވިނަގަނޑެވެ. ފޭދޫގެ ވަށައިގެންވާ ތަރައްޤީގެ ވިނަގަނޑެވެ.
ފޭދޫ ހިއްކި ބިމުގެ މަންފާއެއް ރައްޔިތުންނަށް ކުރާނެ ދުވަހެއް އެނގެން ރައްޔިތުން ބޭނުމެވެ. އެތަނުގެ މަގު ހެދި ނަރުދަމާ ވަޅުލެވި، އެތަން ތަރައްޤީ ކުރަން ކުރާ މަަސައްކަތެއް ރައްޔިތުން ބަލަން ބޭނުމެވެ. ފޭދޫގެ ބިން ހިއްކުމުގެ ފަހުން ހިއްކި ހުޅުމާލޭގެ ދެވަނަ ފިޔަވަހީގެ ހިއްކި ބިމުގައި މަގު ހަދައި، ލައިޓް ޕޯސްޓް ޖަހައި، ފެނާއި ނަރުދަމާ އަޅަމުން އަންނަ މަންޒަރު ރައްޔިތުންނަށް އެބަ ފެނެއެވެ.
އެތަނުގައި އަޅާ ފްލެޓްތައް މިހާރު ވަނީ ވިއްކަން ހުޅުވާލާފައެވެ. ނަމަވެސް ފޭދޫ ހިއްކި ބިން އަދިވެސް ހިއްކި ގޮތަށް އޮތީއެވެ. މީގެ ކުރިން ސަރުކާރުގެ އޮފިޝަލަކު ބުނީ ހިއްކި ބިމަކަށް ވުމުން ވަގުތު ދޭން ޖެހޭ ކަމަށެވެ. އެކަމަކު ހުޅުމާލެ ދެވަނަ ފިޔަވަހީގެ ހިއްކި ބިމަށް ދިން މުއްދަތު އަދިވެސް ފޭދޫ ހިއްކި ބިމަށް ހަމަ ނުވަނީ ހެއްޔެވެ.
ބިން ފުރި ގޯތި ބަހައިގެން މަތި މައްޗަށް އުޅެން މަޖްބޫރުވެފައިވާ ރައްޔިތުން ތިބި ފޭދޫގެ ބިމުގެ ފައިދާ ރައްޔިތުންނަށް ކުރާނީ ކޮން ދުވަހަކުން ހެއްޔެވެ؟ ހައުސިން މިނިސްޓްރީގެ އޮފީހެއް އެބަހުއްޓެވެ. ސަރުކާރަށް ސަނާ ކިޔާ މެމްބަރަކު އެބަހުއްޓެވެ. އެވެރިންގެ އިޚްލާސްތެރިކަން ނެތުމަކީ ފޭދޫ ރައްޔިތުންގެ ކުށެއް ނޫނެވެ.
ފޭދޫ ރައްޔިތުންނަށް ދިމާވެފައިވާ ބިމުގެ ދަތިކަމަށް ހައްލެއް ނުލިބުނަސް އޮތް ހިތްހަމަޖެހުމަކީ ފޭދޫގެ ވަށައިގެންވާ ތަރައްޤީގެ ވިނަގަނޑެވެ. ހަވީރު ފިންޏަށް ދުއްވާލަން ގޮސް ތަރައްޤީގެ ވިނަގަނޑަށް ބަލަހައްޓައިގެން ތިބެ އެއްބަޔަކަށް "ތަރައްޤީ ޔަޤީން"ކަމުގެ އިޙްސާސްކުރެވެއެވެ.
ތަރައްޤީގެ ވިނަގަނޑުގެ ތެރެއިން ފުޓްސަލް ދަނޑުތަކާއި، ފްލެޓާއި ގެސްޓް ހައުސްތައް މައްޗަށް އަރާނެކަމަށް "ޔަޤީން" ކަމަށް އެމީހުންގެ ޓްވީޓްތަކުގައި ބުނެއެވެ. އަދި ހަމައެހެންމެ ތަރައްޤީގެ ވިނަގަނޑުގެ އަރިމައްޗަކުން ނަމަވެސް އާޓިފިޝަލް ބީޗެއް ވެސް ލިބޭނެ ކަމުގެ ފޮނި ހުވަފެނެއްގެ ވާހަކަވެސް މެއެވެ.
ނަމަވެސް "ޔަގީން" ވާ ކަމަކީ ފްލެޓާއި، ކުޅިވަރު އެރީނާ އާއި ގެސްޓު ހައުސްގެ ބަދަލުގައި "ތަރައްޤީގެ ވިނަގަނޑު" ހަލުވިކަމާއު އެކު ހެދި ބިޔަވަމުން އަންނަ ކަމެވެ.
ފޭދޫގެ ވަށައިގެން "ރޮކެޓް ސްޕީޑުގައި" ހެދެމުންދާ ތަރައްޤީގެ ވިނަގަނޑުގެ ތެރެއިން ފެންނާނެ ކަމަށް ރައްޔިތުން އުއްމީދުކުރާ މަޝްރޫޢުތައް ނުފެށި ދުވަސްތައް ފާއިތުވަމުން ދަނީއެވެ. ފަހަރެއްގައި އެއީ 2017 ވަނަ އަހަރު ފޭދޫ ދާއިރާގެ މެންބަރު އިބްރާހިމްދީދީ ދެއްވި "ޓެސްޓް ޕޭޕަރުން" ފާސް ނުވުމުން ވީ ގޮތެއް ކަމަށް ވެދާނެއެވެ.