ބޭނުން ތަނަކު ބޭނުން އެއްޗެއް ބަހައްޓަންވީއެވެ. މީހަކަށް ނުވަތަ ބަޔަކަށް ވެދާނެ އުނދަގުލަކަށް އެއްވެސް ވަރަކަށް ބެލުމެއް ނޯވެއެވެ. ބަނދަރުގެ އެކި ދިމާލުގައި އަޅާފައިވާ އުޅަނދުތައް އެހެން ހުންނަތާ އެތައް އަހަރެއް ވެއްޖެއެވެ. ވީރާނާވެ ބޭނުންނުކުރެވޭ ހިސާބަށް ގޮސްފައިވާ އުޅަނދުތަކާއި ހުރެ ބައެއް ފަހަރަށް ބަނދަރާއި ގާތްކުރުމަށް ވެސް އުނދަގޫވެއެވެ.
މިފަދަ ގޮތަކަށް މިކަން ހުރި ނަމަވެސް މިކަން ބޮޑުވެގެން އުޅޭ މުއައްސަސާއެއް ނުވަތަ ވެރިއެއް ނެތެވެ. ހުރިހާ ތުރާލެއް ބަނދަރުގެ ބޭނުން ހިފާ މީހުންނަށެވެ.
ބަނދަރު ސަރަހައްދުން ދެން ދިމާވާ އެންމެ ބޮޑު އުނދަގުލަކީ "ހަމައެއް ލަމައެއް ނެތި" ބަހައްޓާފައިވާ އުޅަނދުތައް އެކަންޏެއް ނޫނެވެ.
ހިތަދޫ ފަޅުތެރެއިން ފީނައިގެން ވެލިނަގާ ފަރާތްތަކުން ގެނެސްފައި ހުރި ވެލި ބަސްތާތައް ވެސް އެމީހަކު ބޭނުން ދިމާލެއްގައި ބަހައްޓާއިރު އެކަން ކުރުމުގައި ވެސް ހަމައެއް ނެތެވެ. އެފަރާތްތަކުން ހިތުހުރި ގޮތަކަށް ބަނދަރު ބޭނުން ކުރަމުން ގެންދާއިރު އެކަމާއި ބަހެއް ބުނަން މުއައްސަސާއެއް އައްޑޫގައި ނެތީ ހެއްޔެވެ؟
ޤާނޫނީ ގޮތުން ބަލާއިރު އައްޑޫގެ ބަނދަރުތައް ބެލެހެއްޓުމަކީ މިނިސްޓްރީ އޮފް ހައުސިންގެ ޒިންމާއެކެވެ. ހައުސިން މިނިސްޓްރީގެ އައްޑޫ ޑިޕާޓްމަންޓަށް ޒިންމާ އަދާކުރެވުނު ކަމަށް ގިނަ ބަޔަކު ބުނަނީ ކައުންސިލުން ބަނދަރަށް ފެން ހޮޅި ގުޅަން އުޅުމުން އެކަންޏެވެ.
'އައްޑޫލައިވް' އާއި ވާހަކަ ދެއްކި ބައެއް މަސްވެރިން ބުނިގޮތުގައި ހިތަދޫ ބަނދަރުގެ ބައެއް ސަރަހައްދުތަކުގައި ވީރާނާވެފައިވާ ބޯޓު ފަހަރުތައް ވެސް އެބަހުރި ކަމަށާއި އެތަކެތި އެތަނުން ނެގޭނެ ގޮތެއް ވެސް ނެތް ކަމަށެވެ.
"ކައުންސިލާއި ހައުސިން މިނިސްޓްރީ އަށް ވެސް މައްސަލަ ހުށަހަޅައިފިން. އެކަމަކު އެމީހުންނަށް ވެސް އެތަކެތި ނެގޭނެ ގޮތެއް ނެތް." މަސްވެރިޔަކު ބުންޏެވެ.
ނާލު ބޯޓެއް ގެންގުޅޭ ހިތަދޫ ވިޔަފާރިވެރިޔަކު ބުނިގޮތުގައި ގިނަ ދުވަސްތަކެއް ވަންދެން ބޯޓުތައް އެއް ދިމާލެއްގައި އަޅާފައި ހުންނައިރު، ވީރާނާވާން ދޫކޮށްލާފައިވާ ބޯޓުތައް ވެސް ގިނަ ކަމަށެވެ.
ހިތަދޫ ބަނދަރަކީ، ރަށުގެ މަލަމައްޗެވެ. ކަނޑު މަގުން ހިތަދޫއަށް ގިނަ ބަޔަކު ދަތުރު ނުކުރި ނަމަވެސް، ބަނދަރު ބޭނުން ކުރުމަށް ހަރުދަނާ އުސޫލުތަކެއް ހަދަން އެބަޖެހެއެވެ. ހިތަދޫ ބަނދަރަކީ، ވަކި ބައެއްގެ މިލްކެއް ނޫނެވެ.