ދިވެހިރާއްޖޭގައި އެންމެ ފުރަތަމަ ބޭއްވި ޑިމޮކްރެޓިކް އިންތިޚާބް ކާމިޔާބުކުރެއްވި ކުރީގެ ރައީސް މުހައްމަދު ނަޝީދުގެ ކެންޑިޑޭސީ އިލެކްޝަންސް އިން ބަލައިނުގެންފި ނަމަ އެ މައްސަލަ ސްޕްރީމް ކޯޓަށް ހުށަހަޅާނެ ކަމަށް އެމަނިކުފާނުގެ ކެމްޕޭން މެނޭޖަރު މުހައްމަދު އަސްލަމު ވިދާޅުވެއްޖެއެވެ.
އަސްލަމް މިހެން ވިދާޅުވީ، "ޖަޒީރާ ރައީސް" ނަމުގައި ހުޅުވާފައިވާ އެމްޑީޕީގެ ހަރުގޭގައި ނޫސްވެރިންނަށް މައުލޫމާތު ދެއްވަމުންނެވެ.
ނަޝީދަށް އިންތިޚާބުގައި ވާދަނުކުރެވޭނެ ކަމަށް އިލެކްޝަންސް އިން މިހާތަނަށް ބުނެފައި ނުވާކަން ފާހަގަކުރައްވައި އަސްލަމް ވިދާޅުވީ، ރައީސް ނަޝީދަކީ ރިޔާސީ އިންތިޚާބުގައި ވާދަކުރުމުގެ ޝަރުތު ހަމަވާ ބޭފުޅެއް ކަމަށެވެ.
އަސްލަމު ވިދާޅުވި ގޮތުގައި ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ ޝަރުތުތައް ވަރަށް ސާފުކޮށް ޤާނޫނުތަކުގައި ބަޔާންކޮށްފައިވާ ކަމަށެވެ. އެހެން އެކަން ހުއްޓައި އެ ޤާނޫނުތަކުގެ ބޭރުން ކޮންމެ ވާހަކައެއް ދެއްކި ނަމަވެސް "ޖަޒީރާ ރައީސް" ކެމްޕޭން ހުއްޓާ ނުލާ ކުރިއަށް ގެންދާނެ ކަމަށް އަސްލަމް ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީ މެއި މަހުގެ 30 ވަނަ ދުވަހު ބޭއްވުމަށް ހަމަޖެހިފައިވާ އިރު، އެ ޕްރައިމަރީ އިލެކްޝަނުން ހުއްޓުވާނެ ކަމުގެ އަޑުތަކެއް ވެސް ދަނީ ފެތުރެމުންނެވެ.