މިއަދު ފާހަގަ ކުރަމުން އަންނަ ބައިނަލްއަގްވާމީ ވެކްސިން ދިނުމުގެ ހަފުތާ އާ ގުޅިގެން އައްޑޫ ޕަބްލިކް ޔުނިޓުން ހަރަކާތްތަކެއް ފަށައިފި އެވެ.
އެ ޔުނިޓްގެ އޮފިޝަލަކު މިއަދު ވިދާޅުވީ މިއަދުން ފެށިިގެން މި މަހުގެ 30 ވަނަ ދުވަހާ ހަމައަށް ވެކްސިން އާ ގުޅޭ ހަރަކާތްތައް ކުރިއަށް ގެންދަން ނިންމާފައިވާ ކަމަށެވެ. އެގޮތުން ވެކްސިން ދިނުުމުގެ މުހިއްމުކަމާ ގުޅޭ ގޮތުން އައްޑޫގެ ހުރިހާ ރަށްރަށުގެ އާންމުންނަށް މައުލޫމާތު ދެމުން ގެންދާނެ ކަމަށް އޭނާ ވިދާޅުވި އެވެ.
މީގެ ކުރިން ތުއްތު ކުދިންނަށް ދެމުން އައި ވެކްސިންގެ ބަދަލުގައި ޕެންޓަވެލަންޓް ކިޔާ ވެކްސިނެއް އަލަށް މި އަހަރު ތައާރަފްކޮށްފައިވާތީ އެ ވެކްސިނާ ބެހޭ ގޮތުން ފުޅާކޮށް މައުލޫމާތު ދެމުން އަންނަ ކަމަށް ޕަބްލިކް ހެލްތުން ބުންޏެވެ.
"އަޅުގަނޑުމެން މި އަންނަނީ މާބަނޑު މީހުންނަށާއި އަދި ވެކްސިން ދޭން ޖެހޭ އުމުރުގެ ކުދިންގެ ޕޭރަންޓުންގެ އިތުރަށް ވެސް މިކަމަށް ހޭލުންތެރިކަން އުފެއްދުމުގެ ގޮތުން އާންމުންނަށް މައުލޫމާތު ފޯރުކޮށް ދެމުން،" އޮފިޝަލް ވިދާޅުވި އެވެ. "އެހެންވީމާ މިކަމަށް ހާއްސަ ކުރެވިގެން ކުރާ މަސައްކަތް މި މަހުގެ 30 ގެ ނިޔަލަށް ކުރިއަށް ދާނެ އައްޑުގެ ހުރިހާ ރަށެއްގައި ވެސް."