މެލޭޝިޔާގެ ބޮޑުވަޒީރުގެ ކުރީގެ ނައިބު އަންވަރު އިބްރާހިމް ވަނީ ދިވެހި ރާއްޖޭގެ ކުރީގެ ރައީސް މުހައްމަދު ނަޝީދުގެ ސިޔާސީ ހަޔާތުން ފިލާވަޅު ހޯއްދަވާފައި ކަމަށް އަންވަރުގެ ދަރިކަނބަލުން އިއްޒާ އަންވަރު ވިދާޅުވެއްޖެއެވެ.
ނަޝީދު ކުރެއްވި ޓުވީޓަކަށް ރިޕްލައި ކުރައްވަމުން މެލޭޝިޔާގެ މަޖިލީހުގެ މެމްބަރުކަން ވެސް ކުރައްވަމުން އަންނަ ނޫރުލް އިއްޒާ ވިދާޅުވެފައިވަނީ ރައީސް ނަޝީދު ކުރެއްވި މަސައްކަތުން އަންވަރު ވަނީ ފިލާވަޅު ހޯއްދަވާފައި ކަމަށެވެ.
@anwaribrahim – taking a leaf from the pages of former President @MohamedNasheed ? https://t.co/a5pli0QMUi
— Nurul Izzah (@n_izzah) May 24, 2018
އިއްޒާ ރިޕްލައި ކުރެއްވީ އަންވަރު މިނިވަން ވުމުން، އެކަމަށް މަރުހަބާ ދެންނެވުމަށް އަންވަރާއި އަނބިކަނބަލުން އަދި ދަރިކަނބަލުން އިއްޒާ ޓެގް ކުރައްވައި ނަޝީދު މިމަހުގެ 16 ވަނަ ދުވަހު ކުރެއްވި ޓުވީޓަށެވެ.
މެލޭޝިޔާގެ ކުރީގެ ބޮޑުވަޒީރު ނަޖީބު ރައްޒާގް އަންވަރު ޖަލަށް ލާފައިވަނީ 2015 ވަނަ އަހަރުގައި، އޭރުގެ އިންތިޚާބުން އަންވަރު ކުރި ހޯއްދަވާނެ ކަމަށް ލަފާ ކުރެވުމުން ކަމަށް ކަމާ ބެހޭ ފަރާތްތަކުން ވަނީ އޭރު ބުނެފައެވެ. މިދިޔަ އިންތިޚާބުގައި ނަޖީބު ބަލިވެ ވެރިކަމަށް މެލޭޝިޔާގެ ކުރީގެ ބޮޑުވަޒީރު ޑރ. މަހާތީރު އަނެއްކާވެސް ވަޑައިގެންނެވުމަށް ފަހު ރަސްގެފާނު ވަނީ އަންވަރުއަށް މައާފް ދެއްވައި ޖަލުން މިނިވަން ކުރައްވާފައެވެ.
ލަފާ ކުރެވޭ ގޮތުގައި މަހާތީރަށް ފަހު ދެން މެލޭޝިޔާގެ ބޮޑުވަޒީރުގެ މަގާމަށް ވަޑައިގަންނަވާނީ އަންވަރެވެ. އުމުރުން 70 އަހަރުގެ އަންވަރު މިނިވަން ވުމާއެކު އަލުން ސިޔާސީ ދާއިރާއަށް ވަދެ މަސައްކަތް ކުރައްވާނެ ކަމަށް ލަފާ ކުރެއެވެ.