މިޓިސުބުޝީ ގޯދިއްޔާ ފުޓްސަލް ކަޕް 2018ގެ ގްރޫޕް އޭގެ ފުރަތަމަ މެޗް ކާމިޔާބުކޮށް އެފްސީ ބޭރުމަތިން ހަމަޖެހިލައިފިއެވެ.
2017 ވަނަ އަހަރުގެ ގޯދިއްޔާ މުބާރާތުގެ ޗެމްޕިއަން އެފްސީ ބޭރުމަތިން ރޭގެ ކާމިޔާބުކުރީ ޒެފިޔާ އެފްސީ އާއި ވާދަކޮށް 0-6 އިންނެވެ.
އެފްސީ ބޭރުމަތި ޓީމުގެ ފަރާތުން މޮޅު ކުޅުމެއް ފެނިގެން ދިޔަ މިމެޗްގައި އެ ޓީމުގެ އަލީ ހާފިޒް(އައްޔަ) ވަނީ ހެޓްރިކް ހެދި އިރު ކެޕްޓަން އަހްމަދް ނާޝިދު ވެސް ވަނީ 2 ގޯލް ޖަހާފައެވެ. ބޭރުމަތި ޓީމުގެ އަނެއް ގޯލް ކާމިޔާބުކޮށްދިނީ އިބްރާހިމް ސިނާހެވެ.
ޒެފިއާ ޓީމުގައި ހިމެނޭ އެންމެ މުހިއްމު ދެ ކުޅުންތެރިން ކަމުގައިވާ ހަސަން ރާއިފް އަހްމަދް(ހަންނާ) އާއި މުހައްމަދު ތިލްމީޒް(ބިއްޑޭ) ނުލައި ކުޅުނު މި މެޗްގައި އެޓީމުގެ ފަރާތުން ފެނުނީ ދަށް ކުޅުމެކެވެ.
ރޭގެ މެޗްގެ މޮޅު ކުޅުންތެރިޔަކަށް ހޮވުނީ އެފްސީ ބޭރުމަތި ޓީމުގެ އަލީ ހާފިޒް(އައްޔަ)އެވެ.