މިޓިސުބުޝީ ގޯދިއްޔާ ފުޓްސަލް ކަޕް 2018ގެ ގްރޫޕް ސީގެ ފުރަތަމަ މެޗްގައި މިރޭ ފޭދޫ ފްރެންޑްސް ކްލަބާއި މަރަދޫ ޑީސީ ސްޕޯޓްސް ބައްދަލުކުރާނެއެވެ.
2010 ވަނަ އަހަރު އުފެއްދި ފްރެންޑްސް ކްލަބަކީ، އައްޑޫގެ ފުޓްބޯޅައިގައި އާ ނަމެއް ނޫނެވެ. އެ ޓީމުން ހޯދާފައިވާ ކާމިޔާބީ ތަކުގެ ލިސްޓާއި އެއްވަރަށް ހުނަރުވެރި ކުޅުންތެރިން ވެސް ފުޓްބޯޅަ ދަނޑަށް ވަނީ ނެރެ ދީފައެވެ.
އެހެންވެ ގޯދިއްޔާ މުބާރާތުގައި ވެސް އެ ޓީމަކީ ކޮންމެ އަހަރަކު ވެސް ފެވަރިޓުންގެ ލިސްޓުގައި ހިމެނޭ ޓީމެކެވެ. 2016 ވަނަ އަހަރުގެ ގޯދިއްޔާ މުބާރާތުގެ ރަނަރަޕްކަން ހޯދިއިރު މިދިޔަ އަހަރު އެޓީމު ވަނީ ސެމީ ފައިނަލުގައި ވާދަކޮށްފައެވެ.
ޑީސީ ސްޕޯޓްސް ކްލަބަށް ބަލާއިރު މިދިޔަ އަހަރުގެ މުބާރާތުގައި އެ ޓީމު ލައްވާލީ ވަރުގަދަ ގްރޫޕެއްގައެވެ. އެފްސީ ބޭރުމަތި އާއި ޔުނައިޓެޑް ފްރެންޑްސް އާއި އެކު ގްރޫޕް ސީގައި ވާދަކޮށް އެޓީމުން ވަނީ ގްރޫޕްގެ 3 ވަނަ ހޯދާފައެވެ.
ގޯދިއްޔާ މުބާރާތުގެ ތާރީޚަށް ބަލާއިރު 2016 ވަނަ އަހަރުގެ މުބާރާތުގައި ފްރެންޑްސް ކްލަބުން ވަނީ ޑީސީ ސްޕޯޓްސް ކޮޅަށް 9 ލަނޑު ޖަހާފައެވެ.
އެހެން ނަމަވެސް ޑީސީ ސްޕޯޓްސް އިން މިދިޔަ އަހަރުގެ މުބާރާތުގައި ވަރަށް ޒުވާން ސްކޮޑަކާ އެކު ނިކުމެ ރަނގަޅު ނަތީޖާތަކެއް ހޯދާފައިވުމުން މިރޭގެ މެޗު ފްރެންޑްސް ކްލަބަށް ފަސޭހަ ވާނަ ކަމަކަށް ނުބެލެވެއެވެ.
މަރަދޫ ވެންބޮޅޮފިށި ސްޓޭޑިއަމްގައި ކުޅޭ މި މެޗް ފަށާނީ މިރޭ، 9:30 ގައެވެ.
ފްރެންޑްސް ކްލަބާއި ޑީސީ ސްޕޯޓްސްގެ އިތުރުން ގްރޫޕް ސީގައި ހިމެނެނީ ލޮނަ އެފްސީ އާއި އެފްސީ ކަނޑިހެރަ އެވެ.