މިޓިސުބުޝީ ގޯދިއްޔާ ފުޓްސަލް ކަޕް 2018ގައި ރޭ އެސްއެމްޓީ އާއި ބައްދަލުކުރި މެޗް އެފްސީ ސްކޫޕް ކަންމަތިިން ކާމިޔާބުކޮށްފިއެވެ.
މަރަދޫ ވެންބޮޅޮފިށި ސްޓޭޑިއަމްގައި ކުޅުނު މިމެޗް ސްކޫޕް ކަންމަތިން ކާމިޔާބުކުރީ 0-8 އިންނެވެ.
ރޭގެ މެޗްގައި ސްކޫޕް ކަންމަތިން މޮޅު ކުޅުމެއް ދައްކާފައިވާއިރު، އެސްއެމްޓީއަށް އެހާ ރަނގަޅަށް ކުޅެވިފައެއް ނުވެއެވެ.
އޭގެ ނަތީޖާއެއްގެ ގޮތުން އެޓީމުގެ ކުޅުންތެރިންގެ ފަރާތުން ގިނަ އަދަދަކަށް ފައުލްތައް ފެނިގެން ގޮސްފައިވާއިރު އެޓީމުގެ އަބްދުލް ބާސިތު އަށް ވަނީ ރަތްކާޑު ވެސް ދައްކާފައެވެ.
ސްކޫޕް ކަންމަތީގެ 2 ލަނޑު ފުރަތަމަ ހާފުގައި ފެނިގެން ގޮސްފައިވާއިރު ދެވަނަ ހާފުގައި އެ ޓީމުން ވަނީ 6 ލަނޑު ޖަހާފައެވެ.
ސްކޫޕް ކަންމަތީގެ މުހައްމަދު ޝިރުހާން އާއި ނާއިފް ޝަފީޤް ކޮންމެ ކުޅުންތެރިއަކު ދެ ލަނޑު ކާމިޔާބު ކުރިއެވެ. އެޓީމުގެ އަނެއް ލަނޑު ސަޔަމް ސައީދު ކާމިޔާބު ކުރި އިރު، ޝަހީމް އަބްދުލް ޤާދިރް ވަނީ ހެޓްރިކެއް ހަދާފައެވެ.
ރޭގެ މެޗްގެ މޮޅު ކުޅުންތެރިއަކަށް ވެސް ހޮވުނީ މުޅި މެޗްގައި މޮޅު ކުޅުމެއް ދެއްކި ޝަހީމެވެ.