އިންފްލުއެންޒާ ފަދަ ބަލިތައް ރާއްޖޭގައި ފެތުރެމުންދާތީ ވީހާވެސް އަވަހަކަށް ސަލާމަތީ ފިޔަވަޅު އެޅުމުގެ ގޮތުން އިންފްލުއެންޒާ ވެކްސިން ޖެހުމަށް ހެލްތް ޕްރޮޓެކްޝަން އޭޖެންސީއިން އިލްތިމާސްކޮށްފިއެވެ.
އެޗް1 އެން1 އާއި އިންފްލުއެންޒާ ވައިރަސްއިން ސަލާމަތްވުމަށް ބޭނުންކުރެވޭ އިންފްލުއެންޒާ ވެކްސިން ޖެހުމަށް އެންމެ ބޮޑަށް އިލްތިމާސް ކުރަނީ ހޮސްޕިޓަލްތަކާއި ފާމަސީތައް އަދި ސިއްހީ ދާއިރާގައި މަސައްކަތް ކުރާ ފަރާތްތަކަށެވެ.
އެޗްޕީއޭއިން ވަނީ ވެކްސިން ޖެހުމަށް އިލްތިމާސްކޮށް، މިއަދު އެކަމަށް ޚާއްސަ ގައިޑުލައިނެއްވެސް ނެރެފައެވެ. އެގޮތުން ދަމަނަވެއްޓާއި ސެނެހިޔާ، ހުޅުމާލެ ހޮސްޕިޓަލް، އައިޖީއެމްއެޗް އަދި އޭޑީކޭ ހޮސްޕިޓަލުން މި ވެކްސިން ޖަހޭނެއެވެ.
ނަމަވެސް ހިތަދޫ ރީޖަނަލް ހޮސްޕިޓަލުން އިންފްލުއެންޒާ ވެކްސިން ޖެހޭނެތޯ ބެލުމަށް "އައްޑޫލައިވް" އިން ކުރި މަސައްކަތް ކާމިޔާބު ވެފައެއް ނުވެއެވެ. މިދިޔަ އަހަރުތެރޭ އިންފްލުއެންޒާ ރާއްޖޭގައި ފެތުރިގެން ދިޔައިރު ހިތަދޫ ރީޖަނަލް ހޮސްޕިޓަލުގައި އިންފްލުއެންޒާ ވެކްސިން ޖެހޭނެ އިންތިޒާމެއް ގާއިމް ކުރެވިފައި ނެތްކަން ފާހަގަކޮށްލެވެއެވެ.