މިޓިސުބުޝީ ގޯދިއްޔާ ފުޓްސަލް ކަޕް 2018ގެ ލޮނަ އެފްސީން ކުޅުނު ފުރަތަމަ މެޗް އެ ޓީމުން ކާމިޔާބުކޮށްފިއެވެ.
މަރަދޫ ވެންބޮޅޮފިށި ސްޓޭޑިއަމްގައި ހިތަދޫ އެފްސީ ކަނޑިހެރަ އާއި ދެކޮޅަށް ކުޅުނު މި މެޗް ލޮނަ އެފްސީން ކާމިޔާބުކުރީ 3-6 އިންނެވެ.
ރޭގެ މެޗްގައި ލޮނަ އެފްސީން ޖެހި 6 ގޯލްގެ ތެރެއިން 4 ގޯލު ފެނިގެން ގޮސްފައިވަނީ މެޗްގެ ފުރަތަމަ ހާފުގައެވެ. އެ ހާފުގައި އެފްސީ ކަނޑިހެރަ އަށް ކާމިޔާބު ކުރެވުނީ އެންމެ ގޯލެކެވެ.
ދެވަނަ ހާފްގައި ދެ ޓީމުން ކުރެ ކޮންމެ ޓީމަކުން ވެސް ވަނީ ދެ ގޯލް ކާމިޔާބުކޮށްފައެވެ.
ލޮނަ އެފްސީގެ ލިޔާހު އާއި ޝާފިއު ވަނީ ކޮންމެ ކުޅުންތެރިއަކު 2 ގޯލް ކާމިޔާބު ކުރިއިރު އެ ޓީމަށް ދެން ލަނޑުތައް ކާމިޔާބުކޮށްދިނީ ފަޒީލް އާއި ސުޖަން އަހްމަދެވެ.
ރޭގެ މެޗްގައި ކަނޑިހެރަ އެފްސީގެ 3 ލަނޑު ވެސް ކާމިޔާބުކޮށްދިނީ އެޓީމުގެ ކެޕްޓަން ހަސަން އަލްފާލެވެ.
މެޗްގެ މޮޅު ކުޅުންތެރިޔަކަށް ހޮވިފައިވަނީ ލޮނަ އެފްސީގެ ލިޔާހެވެ.