ދިވެހިރާއްޖޭގައި އެންމެ ފުރަތަމަ އުފެއްދި ސިޔާސީ ޕާޓީ ކަމުގައިވާ އެމްޑީޕީ އުވާލުމަށް ކޯޓަށް ފޮނުވުން އަވަސް ކުރުމަކީ ވަރަށް މުހިއްމު ކަމެއް ކަމަށް ހޯމް މިނިސްޓަރުގެ ނައިބް އަހްމަދު ސިއްދީޤް ވިދާޅުވެއްޖެއެވެ.
ސިއްދީޤް މިހެން ވިދާޅުވެފައި ވަނީ އެމްޑީޕީގެ ޕްރައިމަރީ ބަލައިނުގަންނަ ކަމަށް އިލެކްޝަންސް ކޮމިޝަނުން ބުނުމުން އެކަމަށް ތާއިދުކުރައްވައި ޓްވިޓާގައެވެ.
"އެމްޑީޕީގެ ޕްރައިމަރީ ބަލައިނުގަންނާނެ. އެޕާޓީ އުވާލަން ކޯޓަށް ފޮނުވުން އަވަސްކުރުން ވަރަށް މުހިއްމު."-ހޯމް މިނިސްޓަރުގެ ނައިބް އަހްމަދު ސިއްދީޤް-
އެމްޑީޕީގެ ޕްރައިމަރީ އަކީ "ޖަރީމާއެއް" ގޮތުގައި ސިފަކުރައްވައި ސިއްދީޤް ވަނީ އެކަމުގައި ބައިވެރިވި ފަރާތްތައް އުމުރަށް ސިޔާސީ ހަރަކާތްތަކުން ދުރުކުރަން ޖެހޭ ކަމަށް ވިދާޅުވެފައެވެ.
އަދި މީގެ އިތުރުން އެމްޑީޕީގެ ޕްރައިމަރީގައި ހަރަކާތްތެރިވި ފަރާތްތައް ބޮޑު އަދަދަކުން ޖޫރިމަނާ ކުރުމަށް ވެސް ސިއްދީޤް ވަނީ ގޮވާލައްވާފައެވެ.
ހޯމް މިނިސްޓަރުގެ ނައިބް އަހްމަދު ސިއްދީޤް ފާހަގަކުރެވެނީ އަބަދުވެސް އިދިކޮޅު ފަރާތްތަކަށް ހަރުކަށި ފިޔަވަޅުތައް އެޅުމަށް ގޮވާލައްވާ ބޭފުޅެއްގެ ގޮތުގައެވެ.