ކްރިމިނަލް ކޯޓުގެ ގާޒީ އާދަމް އާރިފް އެހެން ކޯޓަކަށް ބަދަލުކުރުމަށް ނިންމާފައިވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
މައުލޫމާތު ލިބިފައިވާ ގޮތުގައި އާދަމް އާރިފް ބަދަލުކުރުމަށް ހަމަޖެހިފައިވަނީ ޑްރަގް ކޯޓު ނުވަތަ ޖުވެނައިލް ކޯޓަށެވެ.
ގާޒީ އާދަމް އާރިފް ކްރިމިނަލް ކޯޓުން އެހެން ކޯޓަކަށް ބަދަލުކުރަން ނިންމާފައިވާއިރު، އެބޭފުޅާ ވަނީ އުއްތަމަ ފަނޑިޔާރު އަބްދުﷲ ސައީދު އާއި ފަނޑިޔާރު އަލީ ހަމީދްގެ އެންގުމަށް ކޯޓު އަމުރެއް ނެރުއްވާފައިކަމަށް އިއުތިރާފްވެވަޑައިގެންފައެވެ. މިއީ ފަނޑިޔާރުންގެ ގާނޫނުގެ ހަތަރު ވަނަ މާއްދާއާއި ކަނޑައެޅިގެން ހިލާފް ކަމެކެވެ.
އުއްތަމަ ފަނޑިޔާރު އަބްދުﷲ ސައީދު އާއި ފަނޑިޔާރު އަލީ ހަމީދުގެ އެންގުމަށް ކްރިމިނަލް ކޯޓުން އަމުރު ނެރުއްވި ކަމަށް އާދަމް އާރިފް އިއުތިރާފްވެވަޑައިގެންފައި ވަނީ، ފުލުހުންގެ ތަހުގީގަކަށް ދެއްވި ބަޔާނެއްގައެވެ. އެ ބަޔާން ވަނީ ސޯޝަލް މީޑިޔާގައި ލީކުވެފައެވެ.
11 ޖުލައި 2017 އިން ފެށިގެން ފާއިތުވި މެއި މަހުގެ 28 އާއި ހަމައަށް ކްރިމިނަލް ކޯޓު ހިންގެވުމާއި ހަވާލުވެ ހުންނެވީ ގާޒީ އާދަމް އާރިފެވެ. އެހެން ނަމަވެސް އާދަމް އާރިފްގެ ބަދަލުގައި ކްރިމިނަލް ކޯޓުގެ އިސް ގާޒީ ކަމަށް އެ ކޯޓުގެ ގާޒީ އަހްމަދު ހައިލަމް މިހާރު ވަނީ އައްޔަންކޮށްފައެވެ.
ޕްރޮސިކިއުޓާ ޖެނެރަލް އޮފީހުގެ ޕަބްލިކް ޕްރޮސިކިއުޓާގެ މަގާމު އަދާކުރެއްވި އާދަމް އާރިފް ކްރިމިނަލް ކޯޓުގެ ފަނޑިޔާރު ކަމަށް އައްޔަން ކުރީ، 13 އެޕްރީލް 2016ގައެވެ.
ޕީޖީ އޮފީހުގަައި ހުންނެވިއިރު އެބޭފުޅާ ވަނީ ޖިނާއީ ބޮޑެތި މައްސަލަތަކުގައި ދައުލަތުގެ ފަރާތުން ވަކާލާތު ކުރައްވާފައެވެ. ކުރީގެ ރައީސް މުހައްމަދު ނަޝީދާއި ކުރީގެ ޑިފެންސް މިނިސްޓަރ ކާނަލް ނާޒިމްގެ މައްސަލައިގައި ވަކާލާތު ކުރައްވަން ކޯޓަށް ވަޑައިގެންނެވީ ވެސް އާދަމް އާރިފެވެ.
ކްރިމިނަލް ކޯޓުގެ ފަނޑިޔާރު ކަމުގައި ހުންނަވައި އާދަމް އާރިފް ވަނީ ސިޔާސީ ފަރާތްތަކުގެ މައްޗަށް ދައުލަތުން ދައުވާކުރި މައްސަލަތަކުގެ ޝަރީޢަތް ކުރިއަށް ގެންދަވާފައެވެ. އޭގެ ތެރޭގައި ޖޭޕީގެ ލީޑަރު ޤާސިމް އިބްރާހިމްގެ މައްސަލަ ހިމެނެއެވެ.