ކާމިޔާބު ފިލްމްތަކެއް އެކުގައި ކުޅެފައިވާ ކަރީނާ ކަޕޫރާއި އަކްޝޭ ކުމާރް އަނެއްކާ ވެސް އާ ފިލްމަކަށް ސޮއިކޮށްފި އެވެ.
މި ފަހަރު ދެ ތަރިން ސޮއި ކުރު ފިލްމަކީ ކަރަން ޖޯހަރް ޕްރޮޑިއުސް ކުރާ ފިލްމެކެވެ. އަދި ވަކި ނަމެއް އިއުލާންކޮށްފައި ނުވާ ފިލްމުން ކަރީނާ އާއި އަކްޝޭގެ އިތުރުން ކަރްތިކް އާރިޔާން އާއި ސްރީދޭވީ އަންހެން ދަރިފުޅު ޖާންވީ ކަޕޫރް ވެސް ފެނިގެން ދާނެ ކަމަށް ރިޕޯޓްތައް ބުނެފި އެވެ.
އަކްޝޭ މިހާރު ވެސް އަންނަނީ ކަރަން ޕްރޮޑިއުސް ކުރާ ފިލްމެއް ކުޅެމުންނެވެ. އެއީ ޕަރިނީތީ ޗޯޕްޅާ ބަތަލާގެ ރޯލް ކުޅޭ "ކެސަރީ" އެވެ.
އަކްޝޭ އާއި ކަރީނާ އެކުގައި އެންމެ ފަހުން ކުޅުނީ 2015 ގައި ރިލީޒް ކުރި "ގައްބަރު އިޒް ބެކް" އެވެ. ދެ ތަރިން އެކުގައި ކުޅެފައިވާ ފިލްމްތަކުގެ ތެރޭގައި އެއިތުރާޒް، ތަޝަން، ކަމްބަކްތު އިޝްގް، ތަލާޝް އަދި ބޭވަފާ ފަދަ ފިލްމްތައް ހިމެނެ އެވެ.
ދެ ތަރިން އަލުން އެކުގައި ފެނިގެންދާ ފިލްމަކީ ކަރަން ޕްރޮޑިއުސް ކުރި ބައެއް ފިލްމްތަކުގައި އެސިޓަންޓް ޑައިރެކްޓަރެއްގެ ގޮތުގައި މަސައްކަތްކޮށްފައިވާ ރާޖް މެހެތާގެ އަލަތު ޑައިރެކްޝަނެވެ. އޭނާ ވަނީ "ހަމްޓީ ޝަރްމާ ކީ ދުލްހަނިޔާ" ގެ ޑައިރެކްޓަރު ޝަޝަންކް ކައިތާންއާ އެކު އެސިސްޓަންޓެއްގެ ގޮތުގައި މަސައްކަތްކޮށްފަ އެވެ.