"ފަހު ދިހައިގެ ކޮންމެ ރެއަކު، ސިއްރިޔާތުގައި ފަޤީރަކަށް އެހީތެރިކަމުގެ އަތެއް ދިއްކޮށްލުމަށް ވަކި ޢަދަދެއް ކަނޑައަޅާށެވެ. އެއަށްފަހު ވަރުގަދަ ޢަޒުމަކާއެކު އެކަން ކުރާށެވެ. ވިސްނާލާށެވެ! ފަހުދިހައިގެން ކޮންމެ ރެއަކު މިކަން މިގޮތަށް ކުރެވިއްޖެނަމަ، ލައިލަތުލްޤަދްރީގައި ހޭދަ ކުރެވިފައިވާނެއެވެ. އެގޮތަށް ވެއްޖެނަމަ އެއްހާސް މައްސަރުގެ ހޭދައިގެ ސަވާބު ލިބިގެން ދިޔައީއެވެ."
މިއީ މީގެ 3 އަހަރު ކުރިން 2015 ވަނަ އަހަރުގެ ޖުލައިމަހުގެ 6 ވަނަ ދުވަހު އަޅުގަނޑުގެ ފޭސްބުކް ޕޭޖްގައި ކުރި ޕޯސްޓެކެވެ.
އަޅުގަނޑުގެ މިވާހަކަތައް އޭގެ ތިން އަހަރެއްހައި ދުވަސް ވުމަށްފަހު، މިއަހަރުގެ ރަމަޟާންމަހުގެ ތެރޭގައި އިތުރަށް ތަފްޞީލް ކޮށްދެއްވީ، ނޫރުލްއިސްލާމް ޖަމްޢިއްޔާގެ ނާއިބު ރައީސް، މުޙައްމަދު ނިހާދު ޖަމާލު އެވެ.
ނިހާދުގެ ފޭސްބުކް ޕްރޮފައިލްގައި ހިއްސާކޮށްފައިވާ ޕޯސްޓްގައި ލިޔުއްވާފައިވާ ގޮތުން ރަމަޟާން މަހުގެ ފަހު ދިހައެއްގެ ކޮންމެ ރެޔަކު 100 ރުފިޔާ ﷲ ތަޢާލާގެ މަގުގައި ހޭދަކޮށްގެން 1.97 މިލިއަން ޑޮލަރު ހޭދަކުރުމުގެ ސަވާބާއި ދަރުމަ (އިންޝާﷲ)ލިބޭނެ ކަމަށެވެ.
"(ގާތްގަނޑަކަށް) 2 މިލިއަން ޑޮލަރު ﷲގެ މަގުގައި ހޭދަކުރައްވާށެވެ. އެއީ ނުހަނު ފަސޭހަ ކަމެކެވެ. އެއްހާސް ރުފިޔާ ނަންގަވައި، އެއިން 100 ރުފިޔާގެ ނޫޓެއް ރަމަޟާންމަހުގެ ފަހުދިހައިގެ ކޮންމެ ރެއަކު، ﷲ އަށްޓަކައި ހޭދަކުރައްވާށެވެ. ލައިލަތުލްޤަދްރިއަކީ 83.33 އަހަރު ކަމުގައި ވެފައި މިގޮތަށް ލައިލަތުލްޤަދްރީގައި ހޭދަކުރެވޭ 100 ރުފިޔާ ވެގެންދާނީ ގާތްގަނޑަކަށް 3 މިލިއަން ދިވެހި ރުފިޔާ ކަމަށެވެ. އަދި ﷲގެ ޙަޟްރަތުގައި އަޅާ ކުރާ ކޮންމެ ހެޔޮކަމެއް 10 ގުނަ އިތުރު ކޮށްދެއްވާތީ، އެޢަދަދު ވެގެންދާނީ 30 މިލިއަން ދިވެހި ރުފިޔާ ނުވަތަ 1.97 މިލިއަން ޑޮލަރު ކަމަށެވެ. އެހެންވީމާ، ތިބާގެ 1000 ރުފިޔާ ތައްޔާރު ކުރައްވައި، ގާތްގަނޑަކަށް 2 މިލިއަން ޑޮލަރު ހޭދަކުރުމުގެ ސަވާބާއި ދަރުމަ ލިބިގަތުމަށް ތައްޔާރު ވާށެވެ!"
ލޮބުވެތި މުސްލިމް އަޚުންނޭވެ! މި މެސެޖު ޝެއަރ ކުރައްވުމުގެ ސަބަބުން މީހަކު މިގޮތަށް ޢަމަލުކޮށްފިނަމަ، ﷲ އިރާދަކުރެއްވިއްޔާ އޭނާއަށް އެލިބޭ ފަދައިން ތިބާއަށްވެސް އަޖުރު ލިބިގެން ދާނެއެވެ.
ނިހާދުގެ މި ސްޓޭޓަސް ގިނަ ބަޔަކަށް ފެންނާނެހެން ހެދުމަށް އަޅުގަނޑުގެ ފޭސްބުކް ޕޭޖްގައި ޝެއަރ ކުރުމުން 24 ގަޑިއިރު ނުވަނީސް 870 އަށްވުރެ ގިނައިން ފޭސްބުކްގައި ޝެއަރ ކުރެވި، ވަކިވަކިން ކޮޕީކޮށް ސޯޝަލްމީޑިއާގެ އެކިއެކި ވަސީލަތްތަކުގެ ތެރޭގައި ދައުރުވަމުން އެބަދެއެވެ.
އަދި އެކަމާއި ގުޅިގެން ވަރަށް ގިނަ ފަރާތްތަކުން، ހޭދަކުރައްވާނެ ގޮތަކާމެދު، ނުވަތަ ފައިސާ ދޭނީ ކޮން ފަރާތަކަށް ކަން އޮޅުން ފިލުއްވުމަށް ތަކުރާރުކޮށް ސުވާލު ލިބެމުންނެވެ.
މިއީ ވަރަށްވެސް ހެޔޮކަން ބޮޑުވެގެންވާ ކަމެކެވެ. ޚާއްޞަކޮށް ރަމަޟާންމަހަކީ ހޭދަކުރުމުގެ މައްސަރެވެ. އެކަމުގައި ފުރިހަމަ ނަމޫނާ ދެއްކެވީ ލޮބުވެތި ރަސޫލާ ޞައްލަﷲ ޢަލައިހި ވަސައްލަމައެވެ. އެކަލޭގެފާނު ރަމަޟާންމަހު ދީލަތިވެވަޑައިގަންނަވާ މިންވަރު ޞަޙާބީން ސިފަ ކުރެއްވީ ބާރު ވައިރޯޅިއެއްގެ ސިފައިގައެވެ.
ލޮބުވެތި އަޚުންނާއި އުޚްތުންނޭވެ! އެމީހަކަށް ވެވުނު މިންވަރަކުން ހޭދަކުރައްވާށެވެ! ﷲގެ ޙަޟްރަތުގައި ބައްލަވަނީ މީހާ ހޭދަކުރާ ޢަދަދަކަށް ނޫނެވެ. އެހެން ނަމަވެސް އޭނާގެ އިޚްލާޞްތެރިކަމަށެވެ. ފަހަރުގައި، މިލިއަނުން ހޭދަކުރާ މީހާއަށްވުރެ، ވަކިލާރިކޮޅެއް ހޭދަކުރާ މީހާގެ ހޭދަކުރުން ﷲގެ ޙަޟްރަތުގައި ޤަބޫލުވެގެން ހިނގައިދާނެއެވެ. އޭނާގެ އިޚްލާޞްތެރިކަމުގެ ސަބަބުންނެވެ.
ބޭނުން ޖެހިފައިވާ މީހުން އަޅުގަނޑުމެންގެ ތެރޭގައި ވަރަށް ގިނައެވެ. ފަޤީރުންނާއި މިސްކީނުންވެސް މަދެއް ނޫނެވެ. ބޮޑެތި ބަލިތަކުގައި ޖެހި، ޚަރަދު ކުރާނެ ފައިސާ ނެތިގެން ފަރުވާ ނުކުރެވި ތިބި މީހުން ގިނައެވެ. ކެއިން ބުއިމުގެ ކަންތައް ހަމަޖައްސާ ނުލެވޭހާ ފަޤީރު ޢާއިލާތައް އަޅުގަނޑުމެންގެ މުޖުތަމަޢުތަކުގައި އެބަ އުޅެއެވެ. މިފަދަ މީހުންނަކީ އަޅުގަނޑުމެންގެ ވަށައިގެން އަވަށްޓެރިންގެ ތެރޭގައިވެސް އުޅޭ މީހުން ކަމުގައި ވެދާނެއެވެ.
ގިނަފަހަރަށް އެފަދަ މީހުން ސަލާން ނުޖަހާނަމަ، އެމީހުންގެ ޙާލަތު އަޅުގަނޑުމެންނަށް ނޭނގި އޮވެދެއެވެ. މިއީ ހައްތަހާވެސް މިހޭދައިން ދެވިދާނެ މީހުންނެވެ.
އަދި މިކަމާ ގުޅޭގޮތުން އަޅުގަނޑު ދިވެހިރާއްޖޭގެ މަޝްހޫރު ދީނީ ޢިލްމުވެރިއަކާ މަޝްވަރާ ކުރުމުން ވިދާޅުވީ، ފަޤީރުންނާއި މިސްކީނުން ހޯދުމުގައި އުނދަގޫ ކަމުގައި ވިޔަސް، ރާއްޖެއަށް މަސައްކަތު މީހުންގެ ގޮތުގައި ރާއްޖެއިން ބޭރުން ގެނެވި، އެބައިމީހުން ގެންނަ ފަރާތުން މުސާރަ ނުދީ، ހިފަހައްޓައިގެން ގެންގުޅޭ އެތައް މުސްލިމު އަޚުން މި ދިވެހިރާއްޖޭގައި ތިބިކަމަށާއި، އެފަދަ މީހުންނަށްވެސް، މިފަދަ އެހީއަކުން ދެވިދާނެކަމަށެވެ.
އެފަދަ މުސްލިމުންތައް، އެމީހުންގެ އަމިއްލަ ޤައުމުން ބޭރުގައި ތިބުމުގެ އިތުރަށް އެމީހުންނަށް ލިބެންޖެހޭ އުޖޫރަ ނުލިބުމުން، ނިކަމެތިވެފައިވެއެވެ. ހަމައެހެންމެ، އިސްލާމްދީން ކުރިއެރުވުމަށް ހިލޭސާބަހަށް މަސައްކަތްކުރާ ފަރާތްތަކަށް އެހީތެރިވުމަކީ ވެސް ކުރެވިދާނެ ކަމެކެވެ.
އަދި މިގޮތަށް ހޭދަކުރުމުގައި، ދުރު މީހުންނަށްވުރެ ގާތްތިމާގެ މީހުންގެ ތެރޭގައި ބޭނުން ޖެހިފައިވާ ބަޔަކު ވާނަމަ، އެފަރާތްތަކަށް އެހީތެރިވުމުގެ ހެޔޮކަށް ބޮޑުވެގެން ވެއެވެ. ސަބަބަކީ، ގާތްތިމާގެ ގުޅުން ޤާއިމު ކުރުމުގެ ސަވާބާއި ހޭދަކުރުމުގެ ސަވާބު އެމީހާއަށް އޭރުން ލިބިގެން ދާނެތީއެވެ.
ހޭދަކުރުމުގައި ތިމާގެ މައިންބަފައިންގެ ތެރެއިން މަރުވެފައިވާ ފަރާތަކުގެ ނަމުގައި ހޭދަކުރެވިދާނެއެވެ. އޭގެ ސަވާބާއި ދަރުމަ އެމީހުންނަށް ލިބޭއިރު، ﷲގެ ރަޙުމަތުން ތިމާއަށްވެސް ސަވާބާއި ދަރުމަ ލިބޭނެކަން ދަންނާށެވެ.
އަޅުގަނޑުގެ ދުޢާ އަކީ ފަހުދިހައިގެ ދުވަސްތަކާއި ރޭތައް އެންމެ ހެޔޮގޮތުގައި ހޭދަކުރާ މީހުންގެ ތެރެއިން، ﷲތަޢާލާ އަޅުގަނޑުމެން އެންމެން ލެއްވުމެވެ.
އަދި އިޚްލާޞްތެރިކަމާއެކު އެއިލާހަށް އަޅުކަން ކުރުން މަތީ ދެމިތިބެ، ﷲގެ ރުހިވޮޑިގަތުން ލިބޭފަދަ ޢަމަލެއްގެ މަތީގައި ދެމިތިބުމުގެ ހެޔޮތައުފީޤް އަޅުގަނޑުމެން އެންމެންނަށް ﷲ ދެއްވާށި! އާމީން.
ނޯޓް: މިއީ ޝެއިޚް މުޙައްމަދު އަނީލް 'އައްޑޫލައިވް'ގެ ކިޔުންތެރިންނާއި ޙިއްސާކުރެއްވުމަށް އެދިވަޑައިގެން ފޮނުއްވާފައިވާ ލިޔުމެކެވެ. މި ލިޔުމަށް އައްޑޫލައިވް އިން އެއްވެސް އުނިއިތުރެއް ގެނެސްފައެއް ނުވާނެއެވެ.