މި އަހަރުގެ މާޗްމަހުގެ 30 ވަނަ ދުވަހުން ފެށިގެން ފަލަސްތީނުގެ ގާޒާ ބޯޑަރުގައި ކުރަމުންދާ އިޙުތިޖާޖުގައި އެތައް ބަޔަކު މަރުވަމުން ޒަޚަމްވަމުންދާ އިރު އެ ފަރާތްތައް ސިއްޚީ އެހީތެރިކަން ފޯރުކޮށްދިނުމުގައި އެންމެ އަވަދިނެތި އުޅޭތަން ފެނިގެންދިޔަ އެކަކީ އުމުރުން އެންމެ 21 އަހަރުގެ ރީތި ޒުވާން ފަލަސްތީނުގެ ނަރުހެއް ކަމަށްވާ ރަޒާން އަޝަރަފް ނައްޖާރުއެވެ.
ބަޑީގެ ވަޒަނަކަށް ރަޒާން އަކީ ސިހުނު ޒުވާނެއް ނޫނެވެ. އޭނާގެ މަސައްކަތް ކުރުންމަތީ އޭނާ ދެމިހުރީ ނުހަނު ސާބިތުކަމާއެކުގައެވެ. އިޒްރޭލުގެ ޙަމަލާތައް އަމާޒުވާ ފަރާތްތަކަށް މެޑިކަލް އެހީތެރިކަން ފޯރުކޮށްދިނުމުގައި އޭނާގެ ފިޔަވަޅުތައް އެންމެ ތަންފުކެއްވެސް ފަހަތަށް ނުޖައްސައެވެ. ބުނަމުންދިޔައީ ކެރެެންޏާ ތިމަންނަ ގަޔަށް ބަޑިޖަހާށޭ އެވެ. އޭނާ ބިރެއް ނުގަންނާނެ ކަމަށެވެ.
އިއްޔެގެ ވަގުތެއްގައި ގާޒާ ސިޓީގެ ޚާން ޔޫނުސްގެ ބޯޑަރުގައި ދެމުންދިޔަ ހަމަލާތަކުގައި ޒަޚަމް ވެގެން ބޯޑަރުގެ ފެންސް ކައިރިއަށް ވެއްޓުނު މީހަކަށް ފަރުވާ ދިނުމަށް ރަޒާން ދުއްވައިގަތީ ކުޑަކޮށްވެސް ފަސްޖެހުމެއް ނެތިއެވެ. އޭނާ ލައިގެންހުރި ނަރުސް ހުދު ހެދުން މާރީއްޗަށްވެސް އިޒްރޭލްގެ ސިފައިންނަށް ފެންނާނެއެވެ. އެހެން ނަމަވެސް އެމީހުންގެ ހަމަލާ ރަޒާން އަށް އަމާޒުކޮށްލީ ދެވަނަ ވިސްނުމަކަށް ނުގޮހެވެ. ވަޒަން އޭނާގެ މެޔަށް އެރުމާއެކު އޭނާ ބިންމައްޗަށް މަރުވެގެން ވެއްޓުނު މަންޒަރު ބަލަން ތިބި މީހުންނަށް އެހީ ފަސޭހަ މަންޒަރަކަށް ނުވާނެއެވެ.
ގާޒާގެ ހެލްތް މިނިސްޓްރީން ނެރުނު ސްޓޭޓްމަންޓް އެއްގައި ބުނެފައިވަނީ ރަޒާން އަކީ " ޝަހީދެއް" ކަމަށެވެ. ރަޒާން އަކީ މި އިޙުތިޖާޖުގައި މިހާތަނަށް މަރާލެވުނު ދެވަނަ އަންހެން މީހާއެވެ.
ފަލަސްތީނުގެ ބޯޑަރުގައި ހިނގަމުންދާ ހަމަނުޖެހުމުގައި މިހާތަނަށް 100 އަށްވުރެ ގިނަ މީހުންވަނީ ޒަޚަމްވެފައެވެ. މާޗް 30 ވަނަ ދުވަހުން ފެށިގެން ކުރިޔަށްދާ މި އިޙްތިޖާޖުގައި 129 މީހުން ވަނީ މަރާލާފައެވެ.