ދިވެހިރާއްޖޭގައި މިނިވަން އިންތިޚާބެއް ބޭއްވުމަށް މަގުފަހި ކުރުމަށް ގޮވާލައި ޔޫރަޕިއަން ޔޫނިއަނުން ނެރުނު ބަޔާނުން ރެކިގަންނަން ސަރުކާރުން "ވަރުގަދަ" ރައްދެއް ދިނެވެ.
އެއްބަޔަކު "ގަޓު" ކަމަށް ބުނާ ސަރުކާރުގެ ބަޔާނުން އެ ބުނާ "ގަޓު" ކަމެއް ފާހަގައެއް ނުވިއެވެ. ޚިޔާލަކީ ތަފާތު އެއްޗެއް ކަމުގަ އެއްބަޔަކަށް އެއީ "ގަޓު" ބަޔާނަކަށް ވެދާނެއެވެ.
ޖުމްލަ ގޮތެއްގައި ސަރުކާރުގެ ބަޔާނުގައި ބުނެފައިވަނީ، ގާނޫނު އަސާސީއަށް ގޮންޖަހައި ހިންގާ ޢައިރު ގާނޫނީ ހަރަކާތްތައްވެސް ބޭރުގެ ގައުމުތަކަށް ފެންނަން ޖެހޭނެ ކަމަށެވެ.
ޔަޢުނީ ގޯސްކޮށް އުޅެނީ ނުވަތަ ކަންތައް ކުރަނީ ތިމަންނަމެން އެކަނި ނޫންކަމަށެވެ. އެމީހުން ކުރާ ގޯސްކަންތައް ވެސް ފެންނަން ޖެހޭނެ ކަމަށެވެ. ތެދު ވާހަކަފުޅެކެވެ. އެންމެން ކުރާ ގޯސްކަންތައް އީޔޫ އިން ވެސް ފާހަގަކުރަން ޖެހޭނެއެވެ.
ގޯސްކަންތައް ކުރަނީ ކޮންބައެއްތޯ ނިންމަން ބަހުސް ކުރާކަށް ނެތީމެވެ. އެކަން ކުރަން އުޅެނިކޮށް ސަރުކާރުގެ "އަބުރުފުޅު" ހުތުރުވީ ކަމަށް ނިންމައި ކޮންމެވެސް ކޮމިޝަނަކުން ޖޫރިމަނާއެއް ވެސް ކޮށްފާނެއެވެ. ކުއްލިއަކަށް އަޅާ ބޮޑު "ފިޔަވަޅެއްގެ" ދަށުވުމަކީ ވެސް އެކަށީގެންވާ ކަމެކެވެ.
ކޮންމެ އަކަސް "ގަޓު" ސަރުކާރުގެ ބަޔާން ކިޔާލާފައި އަހަރެންގެ ހިތުގައި އުފެދުނީ މި ސުވާލެވެ. މި ސަރުކާރު މިއުޅެނީ ހަމަ ކުޑަކުދިން ސްކޫލުގައި ކުރާ ކަހަލަ ޝަކުވާ ކުރަން ހެއްޔެވެ؟
ކުލާހުގައި ވާހަކަ ދައްކަނިކޮށް އަދަބެއް ލިބޭ ހިސާބަށް ދިއުމުން ވަރަށް ގިނަ ކުދިން ބުނާނެއެވެ. "މުދައްރިސެވެ. އެކުދިން ވެސް ވާހަކަ ދެއްކިއެވެ. އެމީހުންނަށް ވެސް އަދަބު ދޭން ޖެހޭނެއެވެ."
ސަރުކާރުގެ އަމަލުތައް ވެސް ހުރީ މިފަދައިންނެވެ. ސަރުކާރުން ކުރާ ޤާނޫނާއި ޚިލާފުކަންތައް ހުއްޓާލުމަށް ގޮވާލުމުން ބުނީ، "އިދިކޮޅު ފަރާތްތަކުން ކުރާ ޣައިރު ޤާނޫނީ ކަންތައް ހުއްޓާލަން ގޮވާލަން ޖެހޭނެ" ކަމަށެވެ.
އެއް ގޮތަކީ ސަރުކާރުގެ ބަޔާނަކީ އަމިއްލައަށް ޤާނޫނާއި ޚިލާފު ކަންތައް ކުރާ ކަމަށް ވި އިއުތިރާފެކެވެ. ނުވަތަ ޤާނޫނާ ޚިލާފަށް އަމަލުކުރުމުގައި ކުރި ހޯދަން ސަރުކާރުން މަސައްކަތް ކުރާ ކަމުގެ ހެއްކެކެވެ.