އައްޑޫ ސިޓީ ހިތަދޫ ބަނދަރުގައި މަސްވެރިންނަށް ދަތިވާ ގޮތަށް އެސްޓީއޯގެ މުދާ އުފުލާ ދޯންޏެއް އެޅުމާ ގުޅިގެން މަސްވެރިންގެ ކަންބޮޑުވުން ފާޅު ކުރަން ފަށައިފި އެވެ.
"އައްޑޫ ލައިވް" އަށް އެނގިފައިވާ ގޮތުގައި އެސްޓީއޯގެ މުދާ އުފުލަން ގެންގުޅޭ ދޯނި އެޅި ސަރަހައްދަކީ ހިތަދޫގެ މަސް ދޯނިފަހަރު އާންމުކޮށް އަޅާފައި ހުންނަ ހިސާބެވެ. އަދި އެސްޓީއޯގެ ދޯނިތައް ކައިރި ކުރަނީ، ހިތަދޫ ބަނދަރުގެ އުތުރު ފަރާތަށެވެ.
ނަމަވެސް މިއަދު އެހެން ސަރަހައްދަކަށް އެސްޓީއޯގެ މުދާ އުފުލާ ދޯނި ކައިރި ކުރީ ކީއްވެގެން ކަމެއް ނޭނގެ އެވެ.
މަސް ދޯނިފަހަރު އެޅުމަށް އާންމުކޮށް ބޭނުން ކުރާ ސަރަހައްދުގައި އެސްޓީއޯގެ ދޯނި އަޅާފައި ވަނިކޮށް ހިތަދޫ ދޯންޏެއްގެ މަސްވެރިން ނުރުހުން ފާޅު ކުރަން ފެށުމުން މިހާރު އެސްޓީއޯގެ ދޯނި ވަނީ އެތަނުން ނަގައިފަ އެވެ.
"އަހަރުމެން މައްސަލަ ޖެއްސީ މުދާ ބާލަންވެގެން އެ މީހުންނަށް ވަކި ސަރަހައްދެއް އޮންނަ އިރު ވެސް އައިސް މަސްދޯނި އަޅާ ތަނުގައި އެ މީހުން ދޯނި ބަނދަރު ކުރީމަ،" މަސްވެރިޔަކު ބުންޏެވެ.
އައްޑޫގެ އަވަށްތަކުގެ ބަނދަރުތައް ބެލެހެއްޓުމަކީ ހައުސިން މިނިސްޓްރީގެ ޒިންމާއެކެވެ.
ދެހާސް ފަނަރަ ވަނަ އަހަރުން ފެށިގެން ހައުސިންގެ ދަށަށް އެ ޒިންމާތައް ބަދަލު ކުރި ނަމަވެސް އައްޑޫގެ އެއްވެސް ބަނދަރެއް ބޭނުން ކުރުމަށް އެއްވެސް އުސޫލެއް ޤާއިމްކޮށްފައެއް ނުވެ އެވެ.
މިއަދު ވެސް މަސްވެރިން އެސްޓީއޯގެ އުޅަނދުގެ މައްސަލަ ބޮޑުވެގެން އުޅުނު އިރު އެ ސަރަހައްދުން ހައުސިން މިނިސްޓްރީގެ އެއްވެސް އޮފިޝަލަކު ގޮސްފައެއް ނުވެ އެވެ.
ނަމަވެސް އެގަޑީގައި މަސް ގަންނަން އަތިރި މައްޗަށް ގޮސް ހުރި އައްޑޫ ޑެޕިއުޓީ މޭޔަރު މުހައްމަދު ޔަސްރިފް މަސްވެރިންނާއި ވާހަކަ ދައްކަން މަސައްކަތް ކުރި އެވެ.