ކުރީގެ ރައީސް މައުމޫން އަބްދުލް ޤައްޔޫމް އާއި ޑިފެންސް މިނިސްޓަރ އާދަމް ޝަރީފް އިއްޔެ ބައްދަލުކުރެއްވި ނަމަވެސް މައުމޫނުގެ ދަތްދޮޅިއަށް އަނިޔާއެއް ވެފައި ނުވާތީ އެކަމާއި އުފާކުރައްވާ ކަމަށް ރައީސް މައުމޫނުގެ ޤާނޫނީ ވަކީލު މައުމޫން ޙަމީދު ވިދާޅުވެއްޖެއެވެ.
މައުމޫން ހަމީދު މިހެން ވިދާޅުވެފައި ވަނީ، ރައީސް ޔާމީންގެ މަންދޫބެއްގެ ގޮތުން މިނިސްޓަރު އާދަމް ޝަރީފް ބައްދަލުކުރެއްވި ފަހުން މިއަދު މައުމޫނަށް ޒިޔާރަތްކުރެއްވުމަށް ފަހު ކުރެއްވި ޓްވީޓެއްގައެވެ.
ޝަރީފް ބައްދަލުކުރެއްވުމުން މައުމޫން ވަނީ ޖަލުގެ ހާލަތުގެ ގުޅޭ ކަންބޮޑުވުންތައް ވެސް ހިއްސާކުރައްވާފައެވެ.
ތަންކޮޅެއް ކުރިއަށް ޖެހިލާއިރު، ރައްޔިތުންގެ މަޖިލީހުގެ ޖަލްސާގެ ސެކިއުރިޓީގައި ހުންނެވި ނަމަ "ކޮންމެ ވެސް މީހެއްގެ ދަތްދޮޅި ދުއްވާލީމުސް" ކަމަށް ޑިފެންސް މިނިސްޓަރު އާދަމް ޝަރީފް ވިދާޅުވެފައި ވެއެވެ. އެމަނިކުފާނު އެހެން ވިދާޅުވިކަން ހާމަވެފައިވަނީ ސޯޝަލް މީޑިޔާގައި ލީކުވި އޯޑިއޯ އަކުންނެވެ.
އެހެން ނަމަވެސް މައުމޫނު ހަމީދު "ދަތްދޮޅި" ސަލާމަތުން ހުރީ ކީއްވެގެން ކަމެއް ނޭނގެއެވެ.